Məsuliyyət məsələsi
Əli Kərimli
AXCP sədri
Qazilərimiz əlillik dərəcələrindən asılı olaraq, məsələn, 1000, 1200, 1500 manat aylıq müavinət alsaydı, yüksək səviyyəli və pulsuz müalicə ilə təmin edilsəydi, onların əlillik dərəcəsi almasına süni maneələr törədilməsəydi, bu qədər qısa müddətdə 36 qazi intihar edərdimi?
İlham Əliyev qaziləri özünü öldürmə həddinə çatdıran icra başçılarını dərhal işdən çıxarsaydı, qaziləri özünü öldürmə həddinə çatdıran vəzifəli şəxslər cinayət məsuliyyətinə cəlb olunub məhkəmə qarşısında dursaydı, qazi intiharları dayanmazdımı?
Bir neçə ildir xalq Əmək və Əhalinin Sosial Müdafiəsi Nazirliyinin qazilərlə, əlillərlə, pensiyaçılarla savaş aparmasından, bu həssas təbəqələrdən 1 milyard manatdan artıq vəsait “qənaət etməsindən” şikayətlənir. İlham Əliyev Sahil Babayevi işdən götürüb yeni nazirə də qazilərə, əlillərə, pensiyaçılara zülm yox, xidmət etməyi tapşırsaydı, qazi intiharları dayanmazdımı? Qazilərə, əlillərə, pensiyaçılara münasibət kökündən dəyişməzdimi?
İlham Əliyev istəsəydi, bütün bu işləri görə bilərdimi? Bəli. Bu işləri görməkdə heç kim ona mane ola bilməzdi. Ona görə də trol, yaltaq, malakeş dəstəsi İlham Əliyevi məsuliyyətdən yayındırmaq üçün öz fantaziyaları ilə az ürək bulandırsın. Ölkənin bu vəziyyətə düşməsinə görə də, qazilərin kütləvi intiharına görə də əsas məsuliyyəti şəxsən İlham Əliyev daşıyır.
