Ruhdan bədənə
Qubad İbadoğlu
ADR Partiyasının sədri
Qarabağ qazilərinin bir qismi siyasi oyunlara cəlb edilir, digər qismi təzyiqlərə məruz qalır. Bu iki fərqli yanaşma bir məqsədə – cəmiyyətin mübarizə ruhunu öldürməyə xidmət edir. Platon deyirdi bədəni öldürəndən çox ruhu öldürəndən qorxun.
Avtoritar rejimlər hakimiyyəti qoruyub uzatmaq üçün əxlaqı yüngül insanları hər yerdə irəli çəkməklə ruh öldürmək konsepsiyasından bəhrələnir. 2 il əvvəl, 15 iyulda Qarabağ harayı ilə Azərbaycanda 27 il öləzimiş ruhun oyanması başladı, 44 günlük müharibə dövründə isə xalqın mübarizə və döyüş əzmi ən yüksək səviyyəyə qalxdı.
Bəs sonra nə oldu, nədən xalqın ruhu öldürüldü? Şəhid ailələrinə, Qarabağ qazilərinə və müharibə iştirakçılarına sosial müavinət, pensiya və tibbi xidmət sarıdan davamlı problemlər yaradıldı. Buna dözə bilməyən bir sıra qazi özünə qəsd etdi. Qazilərin bir qismi mübarizəyə qalxdı, bir qismi isə mükafatlandırılaraq siyasi oyunlara cəlb olundu. Beləliklə, xalqın 15 iyul 2020-ci ildən dirçələn, müharibə dövründə zirvəyə yüksələn ruhu hakimiyyətin qazilərə fərqli münasibəti, cəmiyyətin də buna susqun qalması ucbatından məqsədli şəkildə sındırıldı.
Bədəndə ruh öləndə cəmiyyəti simasızlaşdırmaq, xalqı milli və əxlaqi şüurdan, mənəviyyatdan, şəxsiyyətdən məhrum etmək asanlaşır. Hippokrat deyirdi ki, qüvvətli ruh zəifləmiş bədəni xilas edir. Odur ki, ilk növbədə milli və əxlaqi şüuru inkişaf etdirməklə ruhumuzu özümüzə qaytarmalı, bədənimizi də bu yolla xilas etməliyik.
