Hazır olmalı
Qubad İbadoğlu
ADR Partiyasının sədri
Demokratiya, avtoritarizm tam olmaya bilər, amma azadlıqlar yarımçıq ola bilməz. Siyasi partiyaların bir qrupunu qeydiyyata alıb digərinin qeydiyyatından davamlı və əsassız imtina edirsənsə, deməli, birləşmə azadlığını; polis etiraz aksiyasının birinə loyal yanaşıb o birisinə müdaxilə edirsə, deməli, sərbəst toplaşma azadlığını; hava ilə səyahət etməyə imkan verib quru yolları bağlayırsansa, deməli, sərbəst hərəkət azadlığını; medianın birinə dəstək verib o birisinin yayımına əngəl yaradırsansa, deməli, söz azadlığını; fərdi azadlıqların bir qrupuna şərait yaradıb başqa qrupuna baryer qurursansa, deməli, fərdi azadlıqları təmin etmirsən. Belə olanda yarımçıq edilənlər imitasiya xarakteri daşıyır.
Azərbaycan hakimiyyəti insanların hüquq və azadlıqlarına hörmət etməli, onların təminatında diskriminasiyaya yol verməməlidir. Azadlıqların və haqların qorunması üçün müstəqil məhkəmə və ədliyyə sistemi yaranmalı, hüquq dövləti qurulmalı, heç kim qanundan üstün tutulmamalıdır.
Bütün bunlar əvvəl-axır Azərbaycanda da bərqərar olacaq. Müasir dünyada, xüsusilə də Azərbaycanın yerləşdiyi siyasi coğrafiyada dövləti orta əsr qaydaları ilə idarə etmək praktikası davamlı ola bilməyəcək, ən azından Putin Rusiyasının hazırkı davranışlarından əziyyət çəkən sivil cəmiyyətlər və hakimiyyətlər buna yol verməyəcək, amma kimin qabağa düşməsi xalqların fəallığından və hazırlığından asılı olacaq. Azərbaycan xalqı, xüsusilə də siyasi partiyalar və sivil toplumlar bu dəyişikliklərə hazırlaşmalıdır.
