Yapışmaz damğa
Əli Kərimli
AXCP sədri
Müsəlman Birliyi Hərəkatı öncüllərindən Abbas Hüseyn nümunəsi rejimin Taleh Bağırov və Müsəlman Birliyi Hərəkatını İran agenti elan etməsi kampaniyasının ifşasına kifayətdir. Cəza yerində Abbas Hüseyn bilirsiniz ən ağır işgəncələrə nəyə görə məruz qalmışdı? Hansısa İran mollası ilə əlaqəsinə görə? Yox. Qobustan həbsxanasından sosial şəbəkələrə mesaj göndərib mənim ad günümü təbrik etmişdi. Həmin təbrikə görə onu orta əsrlərdəki kimi çarmıxa çəkmişdilər. Əllərini, ayaqlarını qandalla əks istiqamətlərə bağlayıb özündən gedənədək o vəziyyətdə saxlamışdılar.
2021-ci ilin payızında İrandan Xankəndiyə qanunsuz yüklərin daşınmasına görə Azərbaycanla İran arasında gərginlik yarananda bu gün sosial şəbəkədə yaxa cıranlar ortada deyildi, yoxa çıxmışdılar, ancaq Abbas Hüseyn ortaya əsl vətəndaşlıq mövqeyi qoydu. Həbs yerindən bəyanat göndərən Abbas Hüseyn yazırdı: “Biz Əli şiəsiyik. İranın yox… Hamı bilsin ki, hər zaman haqqı, ədaləti, islami dəyərləri sevdiyim kimi öz vətənimi, millətimi və dövlətimi də sevmişəm.
Bilirik ki, bütün dinlər və sonuncu din islam da doğru yaşamağı, haqqı qorumağı və haqlı olanın yanında olmağı əmr edir…
Çox təəssüf ki, sadə vətəndaşın müsəlmana gələ biləcək zərər barədə düşünə bildiyini böyük bir islam dövləti illərdir düşünə bilməyib. İllərdir öz yanacağını müsəlman qanını töküb torpaqlarını işğal edən, məscidləri sökən ermənilərə göndərib. Sadə bir müsəlmanın çəkindiyi əməli bu boyda islam dövlətinin etməsi təəssüf hissi yaradır. Bu əməllər “Zalıma xidmət etmək haramdır” deyən imam Əli əleyhissəlamın kəlamını tapdalamaq və haqqı gizlətmək anlamına gəlir.
Özünü dünyaya islam təəssübkeşi kimi tanıtdıran bir dövlətin maddi marağa görə gördüyü işin ağrı-acısını 30 il xalq olaraq çəkdik.
Satılan yanacağın sayəsində tanklar, zirehli texnikalar, əlisilahlılara xidmət edən maşınlar Vətən müharibəsində müsəlman qardaşlarımı şəhid etdi. Ticarətin maddi xeyrini onlar qazandı, 44 gündə yüzlərlə qardaşımızın həyatına son qoydu. O ticarət olmasaydı, bəlkə də hadisələr bu dəhşətdə olmaz, islamı təhqir edənlər, məscid sökənlər, məzar dağıdanlar daha tez məhv olardı.
Yanacağı ilə müsəlman düşməni ermənini qızışdıranlar indi də raketləri ilə bizləri hədələyir.
Əliqanlı qatillərə dost-qardaş deyənlər, yanlış siyasətinizə son qoyun. Müsəlmanla həmrəy olun, düşmənimiz Ermənistanla yox”.
Belə vətənpərvər və cəsur insanları şərlədib məhbəslərdə çürüdənlər, onlara böhtan atıb “İran agenti” adlandıranlar, rejimin bu qaralama kampaniyasına kor-koranə qoşulanlar heç utanırmı?
Abbas Hüseyn kimi vətənpərvər gəncləri şərləmək həbs etmək, üstəlik də “İran agenti” damğası vurmağa çalışmaq heç bir bəraəti olmayan antiinsani əməldir.
