Qan içməyə şərait
Arif Hacılı
Müsavat Partiyasının başqanı
Ümumi immunitet yarandığı üçün koronavirus Azərbaycanda və bizim bölgədə mövsümi xəstəliyə çevrilib. Dünya, o cümlədən bölgə ölkələri pandemiya üzündən bağladığı quru sərhədləri çoxdan açıb. Azərbaycan sərhədləri isə qapalıdır. Əhalimiz milyardlar hesabına tikilmiş dəmir yollarından, beynəlxalq avtomobil yollarından faydalana bilmir. Sərhəd rayonları əhalisinin dolanışığına müsbət təsir edən xırda ticarət əlaqələri kəsilib.
Qonşu dövlətlərdə – Rusiyada, Türkiyədə, Gürcüstanda yaşayan soydaşlarımız valideynlərinin, ailə üzvlərinin dəfninə, yas mərasiminə gələ bilmir.
İndi Azərbaycanda təyyarə biletlərinin qiyməti dünyanın əksər ölkələrindəki qiymətləri geridə qoyur.
Türkiyədən, İrandan, Rusiyadan, Gürcüstandan gətirilən ərzaq, yüngül sənaye məhsulları, elektrotexnika malları əvvəlkindən qat-qat bahadır, bu da həmin malların satıcısı və müştərisi olan əhalimizə ciddi ziyan vurur.
Xalqın dolanışığını təmin etməli olan hakimiyyət isə quru sərhədləri açmamaqla AZAL-ın və digər aviaşirkətlərin sahiblərinin, başqa sahələr üzərində azğın monopolistlərin daha da varlanmaq üçün xalqın qanını içməsinə şərait yaradır.
