Telefonu əlindən alınmış vətəndaş prezidentə üz tutub
Vəkil Elçin Sadıqov vətəndaş Vüsal Mərdanovun prezident İlham Əliyevə müraciətini yayıb. Müraciətdə deyilir: “27 aprel 2022-ci ildə təyyarə ilə Dubaydan Bakıya gələrkən 4 aprel 2022-ci ildə aktivləşdirilərək istifadəmdə olan, həmin gün Azərbaycanda rüsumunu ödəyərək qeydiyyatdan keçirdiyim mobil telefonu Hava Nəqliyyatında Baş Gömrük İdarəsinin əməkdaşları qanunsuz olaraq əlimdən aldılar, bu barədə qanunsuz akt tərtib edərək anbara qoydular. Bildirdilər ki, göstərişi Hava Nəqliyyatında Baş Gömrük İdarəsinin rəisi Mehman Sadıqov verib.
Qanunsuz hərəkətlə bağlı dəfələrlə müraciət etsəm də, mənə bildirirlər ki, bir aydan az istifadə olunmuş əşya şəxsi əşya hesab edilə bilməz.
“Fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş qaydaları”na əsasən, şəxsi istifadədə olan əşyalara gömrük rüsumunun alınması qadağan oldunduğu halda gömrük əməkdaşları Mehman Sadıqovun göstərişi ilə Heydər Əliyev Hava Limanında insanları talamaqla məşğuldur.
Xahiş edirəm mənim mobil telefonumun qaytarılmasına, Hava Nəqliyyatında Baş Gömrük İdarəsinin rəisi Mehman Sadıqovun fəaliyyətinin araşdırılmasına göstəriş verəsiniz”.
