2021-ci ilin dövlət büdcəsinin icrası barədə qanun layihəsinə nəzər salan iqtisadçı Rövşən Ağayev gömrükdəki vergi-rüsumlar məsələsinə diqqət çəkib. Novator.az-ın məlumatına görə, ekspert yazır ki, 2021-ci ildə gömrük vergi-rüsumlarından azadolmalar xeyli məhdudlaşıb: “2020-ci ildə əlavə dəyər vergisi üzrə azadolmalar 25,5 faiz, idxal rüsumları üzrə azadolmalar 59 faiz təşkil edib, 2021-ci ildə həmin göstəricilər uyğun olaraq 20,6 faizə və 55 faizə düşüb.

Azadolmalardan belə sürətli imtina nəticəsində əlavə dəyər vergisinə cəlb olunan idxal dövriyyəsinin həcmi 2021-ci ildə 1,3 milyard dollar, rüsuma cəlb edilən dövriyyə 864 milyon dollar artıb.

Ölkədəki yüksək inflyasiyada həm idxal vergi yükünün yüksək olması, həm də vergiyə cəlb olunan idxal mallarının əhatə dairəsinin çox geniş olması mühüm rol oynayır.

Dünya Ticarət Təşkilatının illik tarif hesabatlarına baxıb görürsən ki, üzv ölkələrlə müqayisədə Azərbaycan gömrüyündə vergi yükü nə qədər yüksək, onun əhatə dairəsi nə qədər genişdir”.