Tanınmış jurnalist Qadir İbrahimli mayın 20-də vəfat edib. Mətbuat Şurasının nekroloqunda qeyd olunur ki, 19 dekabr 1968-ci ildə Lənkəran şəhərində doğulan Qadir İbrahimli Azərbaycan Dövlət İqtisad Universitetini bitirib, 1994-cü ildən həyatını jurnalistika ilə bağlayıb, ölkənin aparıcı kütləvi informasiya vasitələrində çalışaraq oxucu rəğbəti qazanıb: “İxtisasının verdiyi üstünlüklər, əməksevərliyi onu həm də iqtisadçı ekspert kimi tanıtdırıb.
Ölkə, cəmiyyət üçün əhəmiyyət daşıyan bir sıra layihədə ekspert və koordinator olan Qadir İbrahimli ictimai həyatda fəal iştirakı ilə də seçilib, 2008-ci ildən “Güzəran” Sosial Araşdırmalar İctimai Birliyinə sədrlik edib.
Qadir İbrahimli media ictimaiyyətini narahat edən məsələlərə intensiv və ardıcıl münasibətilə fərqlənib. 2010-cu ildən Mətbuat Şurasının Nəzarət-Təftiş Komissiyasının tərkibində yer alıb, komissiyanın üzvü və sədri kimi fəaliyyət göstərib.
Qadir İbrahimli həmçinin Odlar Yurdu Universitetində iqtisadiyyat və menecment üzrə pedaqoq olaraq da çalışıb, bilik və bacarığını gənc nəslə çatdırıb.
Qadir İbrahimli səmimiyyəti, qayğıkeşliyi, dostcanlılığı, gülərüz siması, pozitiv əhval-ruhiyyəsi ilə onu tanıyan hər kəsin xatirəsində əbədi yaşayacaq”.
