“Güzəştli mənzil”ə müdaxilə
Aprelin 15-də Dövlət Təhlükəsizliyi Xidmətinin rəsmi məlumatı yayılıb. Qeyd olunur ki, Mənzil İnşaatı Dövlət Agentliyinin növbəti layihəsi – Yasamal Yaşayış Kompleksinin ikinci mərhələsində 442 mənzilin 30 mart 2022-ci ildə güzəştlə satışı yerinə yetirilərkən mənzillərin seçimi prosesinə müdaxilə halları müşahidə edilib: “İlkin araşdırmalar aparılaraq Cinayət Məcəlləsinin 273.3.1 və 273.3.2-ci (qabaqcadan əlbir olan bir qrup şəxsin kompüter sisteminə və kompüter məlumatlarına təkrar qanunsuz müdaxiləsi) maddələri ilə cinayət işi başlanıb. Müəyyən edilib ki, Azərbaycan vətəndaşları Məmmədov Elçin Elman oğlu, Hacıyev Ruslan Afiz oğlu, Hüseynov Firudin İlqar oğlu, Lətifzadə Yunis İltimas oğlu, Abdullayev Tərlan Tahir oğlu və Məmmədov Cavid Fəhrad oğlu digərləri ilə əlbir olub ayrı-ayrı qruplar halında xüsusi kompüter proqram təminatları tətbiq etməklə 30 mart 2022-ci ildə Mənzil İnşaatı Dövlət Agentliyinin “Güzəştli mənzil” informasiya sisteminə daxil olub və kompüter məlumatlarını qəsdən təkrar dəyişdirib qanunsuz müdaxilə edib, bu hərəkətləri ilə hüququ olan vətəndaşların ümumi və bərabər əsaslarla güzəştli mənzil əldə etmək imkanını məhdudlaşdırıblar”.
Bu əmələ maddi maraq zəminində, onlara müraciət etmiş şəxslərə güzəştli şərtlərlə mənzil əldə etmək imkanı yaratmaq məqsədilə yol verdikləri bildirilən həmin şəxslərin təqsirləndirilən şəxs kimi cinayət məsuliyyətinə cəlb edildiyi vurğulanır.
“Güzəştli mənzil” sistemi 2017-ci ildə prezident fərmanı ilə işə düşüb. Mənzil İnşaatı Dövlət Agentliyinin sərəncamında olan mənzilləri şəhid ailəsinin üzvü, Vətən Müharibəsi Qəhrəmanı, Milli Qəhrəman, məcburi köçkün və ya ona bərabər tutulan şəxs, bəzi dövlət qulluqçuları, müəllimlər, alimlər, idmançılar, hərbi qulluqçular ala bilər.
