Sosial dalan
İlqar Məmmədov
REAL Partiyasının sədri
Əvvəllər vətəndaşlar öz haqlarını tələb edəndə dövlətin maddi imkanlarının necə paylanmasından çox da söhbət getmirdi. Əsasən məhkəmənin, hüquq mühafizə və seçki orqanlarının ədalətsiz, korrupsiya dolu və digər xəstə motivli qərarları hədəfə alınırdı.
Son illərdə vəziyyət dəyişib. Dövlətdən maddi imtiyazlar tələbi ictimai etirazın əsas formasına çevrilib. Hər növdə sosial müavinət, güzəştli kredit, mənzil, digər imtiyaz və hədiyyələr tələb olunur.
Bu dəyişikliyin müəllifi Yeni Azərbaycan Partiyasıdır. Böyük neft pulları ölkəyə təzə-təzə gəlməyə başlayan illərdə YAP hökuməti qərarlaşmışdı ki, ölkədə bütün maddi imkanları bundan sonra özü bölüşdürəcək, bazar mexanizmlərinə və özəl təşəbbüslərə daha elə də ehtiyac yoxdur.
Neft gəlirləri qəflətən azalanda isə prezident Əliyev acı bir etiraf etdi: “Biz elə bilirdik neft erası 2030-cu illərə qədər davam edəcək”.
İndi dövlət özünün “sosial” olmasından qurtulmaq istəyir, amma geniş kütlənin düşüncə tərzi artıq dəyişib. Hər kəs dövlətin neft vəsaitlərindən birbaşa pay tələb edir.
Bəzi müxalif partiyalar hakimiyyətin oyununu onun özünə qarşı çevirərək illər ərzində ictimai-siyasi gündəmə daha da çox sosializm qatıblar, günü-gündən daha da ağılsız sosial tələblər irəli sürməyə başlayıblar.
Amma sistem məhz bu cür tələblər altında dağılacaqsa, bunun ardı xaosdur, çünki YAP-ın üfürüb şişirtdiyi sosial tələbləri heç bir yeni hökumət təmin edə bilməyəcək. Hətta neft gəlirlərinin hamısı sosial yardıma yönəldilsə belə.
