Baş Prokurorluq rəsmi məlumat yayıb. Qeyd olunur ki, İstintaq İdarəsi Bakının Səbail rayonundakı “Location” gecə klubunda aprelin 3-nə keçən gecə, saat 3 radələrində baş vermiş partlayışla bağlı istintaq aparır: “Hadisə nəticəsində 1 nəfər həlak olub, 37 şəxs xəsarət alıb, 14 avtomobilə, 1 mənzilə və 2 qeyri-yaşayış obyektinə ziyan dəyib. İlkin sübutlara görə, obyektin mətbəxində qanunsuz olaraq, qaydaların tələbləri pozulmaqla propan qazının sıxılmış mayesi ilə dolu qaz balonundan istifadə edilib, balonun partlaması binada dağıntılara və yanğına gətirib.
İaşə obyektini icarəyə götürmüş “Merser food” MMC-nin administratoru Rəsul Rəsulova Cinayət Məcəlləsinin 225.2-ci (yanğın təhlükəsizliyi qaydalarını pozma – ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), MMC-nin təsisçisi, gecə klubunun meneceri Orxan Səfərova Cinayət Məcəlləsinin 314.2-ci (səhlənkarlıq – ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə ittiham elan edilib.
Ərazidə yanğın təhlükəsizliyinin təmin edilməsinə məsul olan Dövlət Yanğın Nəzarəti Xidmətinin inspektoru Ruslan Məmmədov da Cinayət Məcəlləsinin 314.2-ci maddəsi ilə təqsirləndirilən şəxs sayılıb. Hər üç şəxs barəsində Binəqədi Rayon Məhkəməsinin qərarları ilə həbs qətimkan tədbiri seçilib”.
