ABŞ səfirliyinin “Media haqqında” qanuna münasibəti açıqlanıb
ABŞ-ın Azərbaycandakı səfirliyinin “Media haqqında” qanuna münasibəti açıqlanıb.
Novator.az-ın məlumatına görə, “Turan” agentliyinin qanunla bağlı sorğusunu cavablandıran səfirliyin rəsmi nümayəndəsi deyib: “Biz media haqqında yeni qanunun müstəqil jurnalistlərin, KİV sahəsində ekspertlərin və beynəlxalq təşkilatların, o cümlədən ATƏT və Avropa Şurasının rəyi nəzərə alınmadan qəbul edilməsindən və imzalanmasından narahatıq.
Prezident Əliyevin imzaladığı qanunu tədqiq etməyə davam edirik və səbirsizliklə bu və digər ekspertlərin qanunla bağlı təhlillərini gözləyirik.
Hökuməti yeni qanunu ATƏT və digər beynəlxalq təşkilatlar çərçivəsində öhdəliklərinə uyğun şəkildə tətbiq etməyə çağırırıq”.
“Media haqqında” qanun layihəsi 2021-ci il dekabrın 10-da üzə çıxıb, dekabrın 30-da Milli Məclisin son oxunuşundan keçib. 2022-ci il fevralın 8-də prezident İlham Əliyev qanunu imzalayaraq onun tətbiqinə fərman verib.
İndiyədək bir sıra yerli və xarici tənqidçilər media qanunu layihəsinin geniş və məzmunlu məsləhətləşmələr aparılmadan qəbul edilməsindən narahatlıq ifadə edib. Onların fikrincə, layihə insan hüquqları, ifadə azadlığı və kütləvi informasiya vasitələri azadlığı sahəsində beynəlxalq standartlara uyğun deyil, media sahəsini və jurnalist peşəsini həddindən artıq çox tənzimləyir, hakimiyyət orqanlarına lisenziyalaşdırma yolu ilə jurnalistlərin işini məhdudlaşdırmaq səlahiyyəti verir, həmçinin media şirkətlərinin və təşkilatlarının maliyyə fəaliyyətinə, hüquqi fəaliyyətinə və əməliyyat fəaliyyətinə məhdudiyyətlər tətbiq etməyə yol açır.
Qanun layihəsi Milli Məclisdə qəbul ediləndən sonra ABŞ Dövlət Departamenti Azərbaycan prezidenti İlham Əliyevi onu hazırkı formada imzalamamağa çağırmışdı.
Azərbaycan Konstitusiyasının 97-ci maddəsinə görə, qanunlar Milli Məclisdə qəbul edildiyi gündən 14 gün müddətində imzalanmaq üçün prezidentə təqdim olunmalıdır.
Konstitusiyanın 109-cu maddəsinin 19-cu bəndi prezidentə qanunları imzalamaq və dərc etmək hüququ verir.
110-cu maddəyə görə, prezident qanunları ona təqdim olunmuş gündən başlayaraq 56 gün ərzində imzalamalıdır. Qanun prezidentin etirazını doğurursa, o, qanunu imzalamayıb öz etirazları ilə birlikdə Milli Məclisə qaytara bilər.
“Media haqqında” qanunun qeyri-rəsmi layihəsi
Media qanunu ilk oxunuşda (Rəsmi layihə)
Xalq Partiyası media qanunu layihəsinə qarşı çıxdı
Media qanunu: layihəni geri çəkmək təklif olunur
Media qanunu: reaksiyalara reaksiya verildi
Media qanunu: 8 partiyadan çağırış gəldi
Media qanunu: bir razılaşma var
Media qanununa yazılı təkliflər
Media qanunu: son oxunuş neçə maddəyə əl gəzdirir?
“Media qanunu qəbul olunsa da…”
Media qanunu son mərhələyə yön aldı
Media qanunu: imza üçün nə qədər vaxt var?
Prezidentdən layihəni geri qaytarmaq xahiş olunur
