Ya yuxarılar durdurmalıdır…
Arif Hacılı
Müsavat Partiyasının başqanı
İşğaldan azad edilmiş ərazilərin 100 min hektara yaxınında taxıl əkilib-biçilib, taxıl istehsalının həcmi xeyli yüksəlib.
Dünya bazarında enerji daşıyıcılarının qiymətinin yüksəlməsi ilə neft gəlirlərimiz də durmadan artır.
İlin əvvəlindən Cənub Qaz Dəhlizi ilə qaz ixracına başlanıb. İlham Əliyevin dediyi kimi, qaz yataqlarımızda sonsuz həcmdə ehtiyatımız var…
Dövlət büdcəsinə daxil olan vəsait artdıqca əhalinin həyat səviyyəsi yüksəlmək əvəzinə daha da aşağı düşür. Əhalinin gəlirləri, maaşlar, pensiyalar artmasa da, gündəlik tələbat mallarının, ərzağın, tikinti materiallarının qiyməti günbəgün artır.
Adamlar yoxsullaşdıqca kommunal xidmətlərin qiyməti endirilmək əvəzinə daha da artırılır. Camaatı soymaq üçün bütün sahələrdə yeni-yeni tələlər qurulur, fəndlər işlədilir. İl ərzində dəfələrlə benzinin, qazın, elektrik enerjisinin qiymətinin qaldırılması isə əhalinin əksəriyyətini təşkil edən yoxsul təbəqənin belini qırır.
Əhali yoxsulluğa, hər gün yalnız doyunca yemək, övladının dərsliyini, geyimini təmin etmək, kommunal və kredit borclarını ödəmək naminə gecə-gündüz çapalamağa məhkum edildiyi zaman dünyanın hər yerindən Azərbaycan xalqına məxsus milyonların, ofşor hesablarda gizlədilən milyardların sorağı gəlir.
Xalqın yoxsul və varlı təbəqəsi arasında uçurum getdikcə dərinləşir. Varlılar daha da varlanır, yoxsullar daha da yoxsullaşır. Cəmiyyətdə təbəqələşmə dövlət siyasəti səviyyəsinə qaldırılıb.
Azərbaycanı uçuruma aparan bu siyasət, xalqa qarşı belə alçaldıcı davranış durdurulmalıdır. Ya yuxarılar durdurmalıdır, ya da aşağılar durduracaq. Bu vətən bizimdir!
