Çətin xidmətdə (4)
Ənnağı Hacıbəyli
Nəhayət, sentyabrın 28-də zəng vurub məni muştuluqladılar, dedilər sabah saat 14-dən 18-dək gəlib şəxsiyyət vəsiqənizi götürə bilərsiniz.
Sentyabrın 29-u saat 14. 3 saylı “Asan xidmət”dəyəm. Növbə götürüb xanımlara yaxınlaşıram. Dərhal tanış reaksiya ilə üzləşirəm – xanım başının zərif hərəkəti ilə məni göstərir, pıçıldaşma başlayır. Artıq buna yavaş-yavaş öyrəşirəm. Hətta bir az ləzzət də alıram, lap özümü dünyanın ən güclü xüsusi xidmət orqanının agenti kimi hiss eləməyə başlamışam…
Nə isə. Xanım Qurban adlı əməkdaşı çağırıb məni göstərir və qulağına nəsə deyir. Vəsiqəni axtarıb tapır və mənə yox, Qurban müəllimə verirlər. Qurban müəllim harasa gedir, qayıdıb kiminləsə telefonla danışır və vəsiqəni nəzakətlə təqdim edərək məni hörmətlə yola salır.
Mən xidmətin binasından çıxarkən yenidən çağırıb vəsiqəni alır və aktivliyini yoxlayıb qaytarır, yaxşı yol arzulayır. Sevinirəm, nəhayət, adamla normal danışan bir nəfərə rast gəlmişəm…
Qapıda xidmətdən razı qalıb-qalmadığımı soruşan könüllü xanıma ümumiyyətlə razı qalmadığımı, vəsiqəni almaq üçün dörd dəfə bura gəldiyimi deyirəm. Xanım can dəftərinə 3 dənə quş qoyub məni yola salır. Guya kişilər xidmətin keyfiyyətini ölçürlər…
***
“Asan xidmət” vətəndaşlara xidmət və sosial innovasiyalar üzrə dövlət xidmətidir. Prezident yanında publik qurum. Onun yaradılması və fəaliyyətinin hüquq çərçivələrinə sığmadığını qırağa qoyub nədən yarandığına diqqət çəkmək istəyirəm. O, innovasiya-zad deyil, sadəcə dövlət orqanlarında tüğyan edən korrupsiyaya qarşı mübarizədə hakimiyyətin acizliyinin və bu mübarizə üçün gerçək iradənin olmamasının nəticəsidir.
…“Azərişıq”ın kartını itirmişdim. “Asan xidmət”də onu mənə 18 manata satdılar. Neçə il qabaq. Yəqin indi bir az da bahalaşmış olar. Axı indi biz onu innovasiya məhsulu kimi alırıq. İnnovasiya məhsulu isə maya dəyərindən on dəfə baha satılmalıdır. Belə olmasa, asan xidməti adi xidmətdən fərqləndirmək mümkün olmaz.
Dünən cibimizə girən orqanları “Asan”a yığıb adını innovasiya qoymaqla yara sağalmır. “Asan”a transfer olunan və ya yeni işə götürülən adamların təfəkküründə innovasiya yaratmadan dövlət xidmətinin keyfiyyətini yüksəltmək mümkün deyil.
Görünür, bizim asan dövlətə ehtiyacımız var.
