Çətin xidmətdə (3)
Ənnağı Hacıbəyli
Sentyabrın 27-də növbəti dəfə 3 saylı “Asan xidmət”ə – şəxsiyyət vəsiqəsini götürməyə getdim. Yenə həmin xanım vəsiqəni axtarıb tapmayanda onu əvəz edən bəylə pıçıldaşdı, sonra məni başqa bir xanıma tapşırdı.
Bu, keçən dəfə telefon nömrəmi alıb zəng vuracağını deyən əməkdaş idi. Bir neçə pəncərəyə, telefona, başqa əməkdaşlara yaxınlaşıb pıçıldaşandan sonra “Sistemdə sizin vəsiqənizlə bağlı texniki problem var, sənədinizlə bağlı hələ qərar qəbul edilməyib, gedin, biz sizinlə əlaqə saxlayarıq” dedi.
Qayıtdım “Bunu keçən həftə demisiniz, telefon nömrəmi alıb zəng vurmamısınız, zəhmət olmasa, mənə izah edin ki, problem nədir. Mən xüsusi təhlükəli residivistəm, xalq düşməniyəm, ya vətəndaşlıqdan məhrum edilmişəm?”
Xanım yenidən gözləməyi tapşırıb harasa getdi. Xeyli gözlətdikdən sonra gəlib məni sənədlərimi qəbul etmiş xanımın yanına apardı. O da təxminən eyni izahı verdi: “Sizin sənədlər nəyə görəsə idarədə ilişib qalıb, aydınlaşdırmağa çalışırıq, telefon nömrənizi verin, biz sonra sizə zəng vurarıq”.
Bunu keçən dəfə də dediklərini, bu müddətdə nə üçün araşdırmadıqlarını soruşanda belə cavab verdi: “O, başqa işçi olub, mənə dəxli yoxdur, bir gün ərzində araşdırıb sizə məlumat verəcəm”.
Artıq bir aya yaxındır ki, şəxsiyyət vəsiqəsiz qalmışam, banka gedib pensiya kartındakı problemi çözə bilmirəm, şəxsiyyət vəsiqəsi təqdim edə bilmədiyimə görə poliklinika sürücülük vəsiqəsini almaq üçün tələb olunan sağlamlıq arayışını vermir.
“Asan” xidmət, mən dözümlü adamam, amma kimsə dözməyib “Asan”ın qabağında özünü asa bilər. Xidməti bir balaca asanlaşdırın.
