Rusiyada etiraz aksiyalarına çıxmaq istəyənlərin sayı artır
“Levada” sorğu mərkəzi Rusiyada əhalinin kütləvi etiraz aksiyaları ilə bağlı gözləntisini və belə aksiyalara qatılmaq istəyinin səviyyəsini araşdırıb.
Novator.az saytının məlumatına görə, mərkəzin apardığı sorğuların nəticələri göstərib ki, ölkədə kütləvi etirazların baş tutacağını gözləyən rusiyalıların sayı ilin əvvəli ilə müqayisədə azalıb. Ancaq etiraz aksiyalarına qatılmaq istəyənlərin sayında artım var.
Yanvar ayında rusiyalıların 17%-i iqtisadi tələblərlə keçiriləcək etiraz aksiyalarında iştirak etməyə hazır olduğunu bildirmişdi. May ayında bu göstərici 21%-ə qalxmışdı. Avqust ayında isə, “Levada”nın sorğusuna görə, rusiyalıların 24%-i belə aksiyalarda iştirak etməyə hazır olduğunu söyləyib.
O biri yandan da bu cür etirazların baş tutacağını mümkün hesab edənlərin sayında azalma var. Yanvarda respondentlərin 43%-i aksiyaların keçiriləcəyinə inanırdı. Avqustda göstərici 26%-ə düşüb.
Siyasi tələblərlə etirazlara çıxmağa hazır olanların sayı yanvarda 15%, may ayında 16% idi. Avqustda 19%-ə yüksəlib.
Yanvarda rusiyalıların 45%-i siyasi tələblərlə etirazların olacağına inanırdı. Avqustda göstərici 27%-ə enib.
Bu il yanvarın 23-dən 31-dək, habelə fevralın 2-də Rusiyanın bir sıra şəhərlərində hazırda həbsdə olan müxalifət lideri Aleksey Navalnıya dəstək aksiyaları keçirilib. Etirazlar zamanı minlərlə insan saxlanılıb. Onlardan bəzilərinə cəzalar kəsilib.
Mənbə: Novayagazeta.ru
