Mayın 29-u paytaxt Bakıda İqtisadiyyat Nazirliyinin yeni inzibati binası istifadəyə verilib. AZƏRTAC bildirir ki, prezident İlham Əliyev binanın açılışında iştirak edib.

2019-cu il oktyabrın 23-dən İqtisadiyyat Nazirliyinin strukturu belə müəyyən olunub: Aparat (şöbələr və sektorlar); Dövlət Vergi Xidməti; Əmlak Məsələləri Dövlət Xidməti; Antiinhisar və İstehlak Bazarına Nəzarət Dövlət Xidməti; regional bölmələr; Azərbaycanın xarici ölkələrdə fəaliyyət göstərən səfirlik və konsulluqlarında ticarət nümayəndələrinin aparatları. Həmin gündən iqtisadiyyat naziri vəzifəsini Mikayıl Cabbarov tutur.

Nazirlik 2001-ci ildə İqtisadi İnkişaf Nazirliyi adı ilə yaradılıb. 2013-2016-cı illərdə İqtisadiyyat və Sənaye Nazirliyi adlanıb.

Mayın 29-da dövlət başçısı paytaxtın Suraxanı Rayon Məhkəməsinin yeni inzibati binasının istifadəyə verilməsi mərasiminə də qatılıb.

Dövlət başçısı həmçinin Bakı Metropoliteninin yeni stansiyası olan “8 Noyabr”a baş çəkib.

Nazirlər Kabineti Nəsimi rayonu, Ceyhun Səlimov küçəsi, 1065-ci məhəllə ünvanında yerləşən stansiyaya “8 Noyabr” adını 2020-ci il dekabrın 8-də verib. Stansiya “Avtovağzal” və “Memar Əcəmi” stansiyalarından ibarət xətdə, Silahlı Qüvvələrin Mərkəzi Klinik Hospitalının yaxınlığında yerləşir.

Noyabrın 8-i Azərbaycanda Şuşa şəhərinin azad edilməsi günü – Zəfər Günüdür.

Əsası 1750-ci ildə qoyulan Şuşa Qarabağ xanlığının paytaxtı, Qarabağ əyalətinin və Şuşa qəzasının baş şəhəri, Azərbaycanın Dağlıq Qarabağ vilayətində rayon mərkəzi olub. 1992-ci il mayın 8-nə keçən gecə Şuşaya hücum edən erməni birləşmələri mayın 9-da şəhəri ələ keçirib və 28 il 6 ay işğalda saxlayıb.

2020-ci il noyabrın 8-də Azərbaycan hərbçiləri şəhəri düşməndən təmizləyib.