Nədən beləyik?
Qubad İbadoğlu
Bir neçə gündür SOCAR-da başlayan kütləvi ixtisarların qurbanlarından çoxsaylı məktublar alıram, haqsızlıqla üzləşənlərin bundan sonrakı çətinlikləri barədə yazdıqlarını ürək ağrısı ilə oxuyuram, səsli mesajlarını dinləyirəm, sonda xüsusi qeydlərinə, acizanə xahişlərinə məəttəl qalıram. Hər kəs israrla rica edir ki, bu yazışma və ya söhbət öz aramızda qalsın, məlumatı ictimailəşdirəndə mənə istinad etməyin. Baxmayaraq ki, artıq itirməyə heç nəyi qalmayıb, yeganə iş yeri idi, oradan da ixtisara salıb, kənarlaşdırıblar.
Mən “Facebook”da post yazıram, BİZ TV-də veriliş edirəm, şərh bölməsində SOCAR trollarının kütləvi hücumuna və təhqirlərinə məruz qalıram. Kənardan belə görünər ki, SOCAR-a qarşı qərəzim var. Əsla yox, sadəcə, cəmiyyətdə, o sıradan da SOCAR-da baş verən qanunsuzluqlara biganə qala bilmirəm. Haqsızlığa qarşı mübarizəmi bundan sonra da fərqinə varmadan davam etdirəcəm.
Əksər ölkələrdə vətəndaşlar nəinki özlərinin, hətta başqalarının haqlarının pozulmasına etiraz edir, dərhal hərəkətə keçir, həmrəylik nümayiş etdirir, ictimai təpki göstərir, bir çox halda da yaranmış problemlərin yerindəcə həllinə nail olurlar.
Biz isə şəxsi problemlərimizin həllində belə mövqe qoymaqdan çəkinirik, adımızın açıqlanmasından qorxuruq. Nədən beləyik, niyə belə edirik, bu nə qədər davam edəcək?
1971-ci il təvəllüdlü Qubad İbadoğlu iqtisadçı alim, ABŞ-ın Ratqers Universitetinin professorudur.
Azərbaycan Demokratiya və Rifah Hərəkatının sədridir.
Uzun illər Müsavat Partiyasının öncül şəxslərindən olub.
