Bizi nə əzir?
Fuad Qəhrəmanlı
Azərbaycan Xalq Cəbhəsi Partiyası
Cəmiyyət olaraq bizi ayaqda tutan dəyərlərin aşınması dövrünü yaşayırıq. Milli dəyərlərin deqradasiyası ilə bərabər bütövlükdə bəşəri, mədəni dünyaya xas dəyərlərin aşınması, mənasızlaşması probleminin doğurduğu mənəvi böhran içindəyik.
Milli kimliyimizdən, mental-mənəvi xüsusiyyətlərimizdən uzaqlaşdığımız kimi müasir dünyaya da uyğunlaşa bilmirik, qeyri-müəyyənlik, sosial həyatdan psixoloji qopuqluq yaşayırıq, düşüncəmiz, davranışımız dəyər boşluğu üzündən kütləvi iradəyə çevrilə bilmir.
Bunun əsas səbəbi siyasi rejimin məqsədli şəkildə dəyərləri mənasızlaşdırmağa, məhv etməyə çalışmaqla cəmiyyət üzərində total, heç bir mənəvi norma və hüquqla məhdudlaşmayan nəzarət istəyidir. Hakimiyyət bununla hüquqa və əxlaqa zidd siyasətinə cəmiyyətin reaksiya vermək, kütləvi etiraz etmək imkanlarını ortadan qaldırmış olur.
Cəmiyyət olaraq bizi təhqir edən, mənafeyimizə zidd olan çoxsaylı hadisələrə mütəşəkkil reaksiya verə bilmirik. Hüquqa, əxlaqa zidd məsələlərə etinasız qalır, ictimai problemlərə görə şəxsi narahatlıq hissi duymuruq. Özümüzü toplumun bir parçası kimi hiss etdirən dəyər əhəmiyyətsiz göründüyünə görə ictimai məsələlərlə öz şəxsi mənafeyimiz arasında bağlantı qura bilmirik. Öz başımızı salamat saxlamaq istədiyimiz halda cəmiyyətdəki neqativ hallar bizə ard-arda zərbə vurur və biz beləcə öz ictimai-siyasi passivliyimzdən yaranan problemlər altında əzilirik. Məsələn, azad seçkini öz şəxsi marağımıza dəxli olmayan məsələ saydığımıza görə saxta seçki ilə formalaşan hakimiyyət korrupsiya, səriştəsiz idarəçiliklə və hüququ tapdamaqla hər addımda bizi əzir.
Bir insan şəxsiyyətini formalaşdıran dəyərləri itirəndə ləyaqətini itirmiş duruma düşür. Xalq da onu mənəvi-orqanik birliyə çevirən milli və bəşəri dəyərləri itirəndə milli şəxsiyyətsizlik sindromu yaşayır.
Biz bu sindromu çox açıq şəkildə hiss etməkdəyik.
Müəllifin başqa yazıları:
Rusiyanın niyyəti
