Rövşən kişinin yubileyi
Bu gün Rövşən kişinin yubileyidir – 60 yaşı tamam olur. O, dünyanın ən yaxşı atası, həyat yoldaşı, qardaşı, əmisi, dayısı, dostudur. Onun qədər hamıya ürəyi yanan, hamının problemini həll etməyə çalışan, hamının dərdini çəkən ikinci bir adam tanımıram. Kim nə vaxt nə yardım istəsə, bir cavabı var: “Problem yoxdur”.
Böyük qardaşı da adəti üzrə barıtlı iradını saxlamır – sən özün elə başdan-başa problemsən. Özləri bilər, çalışıram onların daxili işinə qarışmayım.
Amma öz adımdan ürəklə deyirəm: Rövşən, sən mənim ən möhtəşəm qardaşımsan. Fəxr eləyirəm ki, bir ana-atanın övladıyıq. Sənin bütün həyatın tər-təmiz, ləyaqətli bir ömür yoludur.
Təbriklər. Tanrı nə yazıbsa, onu ağrı-acısız yaşamağını arzulayıram.
Ənnağı Hacıbəyli
1961-ci il yanvarın 6-da Saatlının Azadkənd kəndində doğulan Rövşən Hacıbəyli Bakı Dövlət Universitetinin jurnalistika fakültəsinin məzunudur. Jurnalist fəaliyyətinə Azərbaycan Xalq Cəbhəsinin İnformasiya Mərkəzində başlayıb. 1992-ci ildən “Azadlıq” qəzetində çalışıb. Məsul katibin müavini, informasiya şöbəsinin müdiri, məsul katib, redaktor müavini, baş redaktor, redaktor postlarını tutub.
1989-cu ildə yaradılan “Azadlıq” qəzeti 2016-cı ildən nəşr olunmur. Rövşən Hacıbəyli hazırda qəzetin elektron versiyasının – Azadliq.info saytının redaktorudur.
