“Dərdini söylərdi kaman…”
Sentyabrın 8-i böyük sənətkar, kaman ustası Habil Əliyevin anım günüdür.
Habil Əliyev 1927-ci il mayın 28-də Ağdaş rayonunun Üçqovaq kəndində doğulub. Rayonda 3 saylı yeddiillik musiqi məktəbini, Bakıda Asəf Zeynallı adına orta ixtisas musiqi məktəbini bitirib. Müslüm Maqomayev adına Azərbaycan Dövlət Filarmoniyasında çalışıb. Keçmiş sovet respublikalarında, eləcə də dünyanın bir çox ölkəsində qastrol səfərlərində olub.
Ustad sənətkar virtuoz ifaçılığı ilə yanaşı gözəl mahnıların da müəllifidir. Onun bəstələdiyi 15-dən artıq mahnı bu gün də sevilə-sevilə ifa olunur.
Habil Əliyev 2015-ci il sentyabrın 8-də Bakıda vəfat edib, Fəxri xiyabanda dəfn olunub.
Novator.az şair Səfər Rzasoylunun görkəmli sənətkarın xatirəsinə həsr etdiyi şerini oxucuların diqqətinə çatdırır.
HABİL ƏLİYEV
O? Yox.
Bilməzdi ki, kaman nədi.
Özü çırpırdı özün,
Şam əllərinə pərvanə kaman
Ah, Pərvanə kaman.
Dirilmişdi haçan, ölmüşdü haçan?
Saçın yolurdu kaman –
Qardaş əlin üstündə
Ah, Bacı kaman.
“Arifdi, bilməzdi dünya nədir”.
Toxunan tək əllərinə
Dərdini söylərdi kaman
Gedənin-gələnin…
Min illərin
Ah, Falçı kaman!
Bacı kaman, Falçı kaman!
Üfüqdən, bu dünyaya uzalı
Əllərinə toxunun –
Toxunun nəfəs kimi!
Səfər Rzasoylu
