Worldometers.info-nun açıqladığı statistikaya görə, dünyada 17,2 milyona yaxın adam koronavirus infeksiyasına yoluxub, onların 670 mindən çoxu ölüb, 5,8 milyondan çoxu aktiv xəstədir.

Azərbaycanda yoluxanların sayı 31 min 221 nəfər göstərilir: onların 438-i dünyasını dəyişib.

2019-cu ilin dekabrında Çində üzə çıxaraq 215 ölkə, ərazi və məkana yayılan koronavirus xəstəliyinə Azərbaycanda ilk yoluxma bu il fevralın 28-də qeydə alınıb. Həmin ay ümumilikdə 3 yoluxma ilə bitib.

Martın 12-si ilk ölüm barədə məlumat verilib. Ayın sonunda ümumilikdə 298 nəfərin koronavirus infeksiyasına yoluxduğu, 5 nəfərin vəfat etdiyi açıqlanıb.

Aprel 1804 yoluxma, 24 ölüm, may 5494 yoluxma, 63 itki, iyun 17524 yoluxma, 213 itki ilə yekunlaşıb.

Martda 5, apreldə 19, mayda 39, iyunda 150, iyulda 225 nəfər koronavirusun qurbanı olub.

Novator.az bildirir ki, Azərbaycan yoluxanların sayına görə dünyada 56-cı, ölənlərin sayına görə 60-cı, sağalanların sayına görə 46-cı, aktiv xəstə sayına görə 54-cü yerdədir.

Azərbaycanda koronavirus infeksiyasını cilovlamaq üçün xüsusi karantin rejimi tətbiq olunur: sərhədlər qapadılıb, bütün kütləvi tədbirlər, o cümlədən toy və dəfn istisna olmaqla yas mərasimləri yasaqlanıb, Bakı, Sumqayıt, Gəncə, Yevlax, Masallı, Cəlilabad, Mingəçevir şəhərlərinin və Abşeron, Bərdə, Siyəzən, Şəki, Xaçmaz, Goranboy, Göygöl rayonlarının ərazisində iri ticarət mərkəzləri, ictimai iaşə obyektləri bağlanıb, vətəndaşların evdən çıxmasına məhdudiyyət qoyulub.