“Ayağa qalxsam, mübarizəmi davam etdirəcəm”

03 İyun 2020
comments
Səidə Hüseynova
Posted in Manşet Xəbər

İsveçrədə müalicə olunan bloqçu Mehman Hüseynov ictimaiyyətə müraciət edib. Novator.az-ın məlumatına görə, iyunun 3-ü “Facebook” şəbəkəsində yayılan müraciətdə bloqçu onu xilas etməyə çalışan hər kəsə təşəkkür bildirir və əlavə edir ki, çətinliklərə öyrəşib: “Həyat məni hər dəfə sınağa çəkir. Ölkədən çıxışıma qadağa, polis bölmələri, döyülmə, 2017-ci ildəki həbs, həbsdə olduğum vaxtı anamı itirməyim, sonra həbsimi uzatmaq istəmələri… Həbsdən çıxdım, yenə döyüldüm və nəhayət, bir gün həkim dedi ki, xərçəngsən.

Həyatım tələb edir ki, mübarizə aparım. Əvvəllər rüşvətxorlarla, millətin qanını içənlərlə, saxtakarlarla mübarizə aparırdım, indi isə özüm özümlə mübarizə aparmalıyam. Əminəm ki, bu şişi də məhv edəcəm”.

Mehman Hüseynov yazır ki, İsveçrəyə mühacirət üçün müraciət edəcəyi halda müalicəsi pulsuz ola bilərdi: “Amma mən bu təklifi rədd etdim. Heç bir mühacirətdən söz gedə bilməz. Mənim öz ölkəm, öz xalqım var. Bundan sonra ayağa qalxsam, öz ölkəmdə mübarizəmi davam etdirəcəm. Sağlamlığım imkan verməsə belə, yenə öz ölkəmdə yaşayacam”.

1989-cu il təvəllüdlü Mehman Hüseynov müxalif bloqçudur, hökuməti tənqid edən videoları ilə tanınır. 2017-2019-cu illərdə həbsdə yatıb.

Onun qardaşı Emin Hüseynov Reportyorların Azadlıq və Təhlükəsizlik İnstitutunun rəhbəridir. 2014-cü ildə Emin Hüseynova cinayət işi qaldırılıb. O, İsveçrənin Bakıdakı səfirliyinə sığınıb, 2015-ci ildə həmin ölkəyə aparılıb.

Emin Hüseynov iyunun 1-də özünün “Facebook” səhifəsində yazıb ki, Mehman Hüseynov ağır xəstədir: “Bir neçə həftə əvvəl həkimlər onda tək fibroz şiş şəklində onkoloji xəstəlik aşkar ediblər. Mehman ən qısa müddətdə müalicəyə başlasa, bu xəstəliyin öhdəsindən gəlmək şansı var.

Müalicənin ilk mərhələsi dəyəri təxminən 30 min İsveçrə frankı edən beş-altı həftəlik radioterapiya kursundan ibarətdir. Radioterapiya tamamlandıqdan sonra həkimlər şişin çıxarılması üçün bir əməliyyat keçirəcək. Radioterapiya sonrası sağalma optimist bir ssenari ilə getsə, əməliyyatın dəyəri 12 min İsveçrə frankı, pessimist ssenari ilə getsə, 44 min frank olacaq. Yalnız xəstəxanada xərcləri ödəmək üçün təxminən 74 min frank lazım gələcək.

Nə məndə, nə Mehmanda bu qədər pul var. Hər zaman insan haqlarını müdafiə edən qeyri-kommersiya təşkilatlarında işləmişik və heç bir əmanətimiz yoxdur.

Azərbaycanda və qonşu Gürcüstanda müalicə və diaqnoz üçün bir neçə uğursuz cəhddən sonra tərəfdaş insan hüquqları təşkilatlarının dəstəyi ilə Mehman İsveçrəyə gələrək lazımı diaqnostik prosedurlardan keçə bildi. Gəliş koronavirus pandemiyasının qızğın vaxtına düşdü. Sərhədlər bağlı olduğundan müalicə və müayinənin daha ucuz başa gələ biləcək yerə getmək imkanımız yox idi.

Mehmanın müalicəsi üçün pul toplamaq gərəkdir. Hazırda onun həyatı təhlükə altındadır və sağlamlığına qovuşa bilməsi üçün dəstəyimizə ehtiyacı var.

Mehmanın taleyinə biganə qalmayan hər kəsi həmrəylik göstərməyə və onun həyatını qurtarmaq və sağlamlığını bərpa etmək üçün 74 min frank toplamağa kömək etməyə çağırıram”.

About author

Son materiallar

Tags

Rəylər

Do not miss

Son materiallar