Koronavirus pandemiyasının Azərbaycanın sosial-iqtisadi həyatına mənfi təsirinin azaldılması ilə bağlı hökumət planında aprel-may ayları üzrə rəsmi yaşayış minimumu – 190 manat məbləğində birdəfəlik ödəmə verilməsi də vardı.

Rəsmi hesabata əsasən, birdəfəlik ödəmə işsiz və xüsusi karantin rejiminə görə işini itirən qeyri-formal işləyən şəxslərdən ibarət 600 min aztəminatlı şəxsi əhatə edib.

Novator.az-ın məlumatına görə, iqtisadçı alim Qubad İbadoğlu 190 manat birdəfəlik ödəmənin müddətini uzatmağı təklif edir: Alternativlər ola bilərdi. Məsələn, yardım alan və ala bilməyən işsizlərə işsizlikdən sığortalanmaq üçün müavinət vermək; işsizləri təhsilinə, ixtisasına və təcrübəsinə uyğun işlə təmin etmək; işsizlərə ünvanlı dövlət sosial yardımı ödəmək mümkündür. Bunların heç biri edilməyibsə, həmin şəxslərin sosial müdafiəsini təmin etmək üçün birdəfəlik ödəmə ən azı karantin dövründə davam etdirilməlidir”.

Koronavirus infeksiyası ilə bağlı xüsusi karantin rejimi martın sonlarında tətbiq olunub, son qərara görə, iyunun 15-də başa çatmalıdır.

Nazirlər Kabinetinin təsdiqlədiyi qaydaya əsasən, dövlət qurumlarından bu ödənişləri alan işsiz şəxslərə 190 manatlıq birdəfəlik ödəmə düşməyib:

– ünvanlı dövlət sosial yardımı alan ailələrin üzvlərinə;

– əmək pensiyaçılarına;

– aylıq müavinət alanlara;

– aylıq təqaüd alanlara;

– özünüməşğulluğun təşkili proqramı çərçivəsində əmlak verilmiş şəxslərə;

– işsizlikdən sığorta ödənişi alanlara;

– peşə hazırlığına görə təqaüd alanlara;

– 2020-ci ildə kənd təsərrüfatı üzrə subsidiya almış şəxslərə;

– əri və ya arvadı sahibkar olanlara (aktiv VÖEN-i olan) və ya rəsmi aktiv əmək müqaviləsi bildirişi olanlara;

– əri və ya arvadı ünvanlı dövlət sosial yardımı və 2020-ci ildə kənd təsərrüfatı üzrə subsidiya alan şəxslərə.