Nazirlər Kabineti yanında operativ qərargahın mayın 4-də yaydığı məlumata görə, Azərbaycanda daha 52 nəfər koronavirus infeksiyasına yoluxub, 39 nəfər sağalaraq xəstəxanadan buraxılıb, 1969-cu il təvəllüdlü bir xəstə vəfat edib.
Rəsmi hesabatda bildirilir ki, ölkədə ümumən 1984 nəfərin koronavirusa yoluxması müəyyən edilib, onların 1480-i müalicə olunaraq sağalıb, 26-sı dünyasını dəyişib: “Xüsusi rejimli xəstəxanalarda 478 nəfər var, 18 nəfərin vəziyyəti ağır, 29 nəfərin vəziyyəti orta ağırdır”.
2019-cu ilin dekabrında Çində üzə çıxan koronavirus xəstəliyi 212 ölkə və əraziyə yayılıb, 249 mindən çox adam ölüb.
Azərbaycanda infeksiyanı cilovlamaq məqsədilə sərhədlər qapadılıb, təhsil ocaqları, mədəniyyət və idman obyektləri bağlanıb, ictimai iaşə və ticarət sektorlarında, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyətlər tətbiq olunub, toy və şənlik məclisləri, dəfn çıxılmaqla yas mərasimlərinin keçirilməsi yasaqlanıb.
