Prezidentin köməkçisi, Prezident Administrasiyasının hərbi məsələlər şöbəsinin müdiri general-polkovnik Məhərrəm Əliyev və müdafiə naziri general-polkovnik Zakir Həsənov ön xətdə yerləşən hərbi hissələrə baş çəkiblər. Mod.gov.az-ın 5 may məlumatına görə, qoşunların təmas xəttindəki əməliyyat şəraiti barədə məruzələri dinlədikdən sonra Məhərrəm Əliyev və Zakir Həsənov üzbəüz yerləşən düşmən mövqelərini müşahidə ediblər. Müdafiə naziri bölmələrin daim döyüşə hazır vəziyyətdə olması barədə tapşırıqlar verib.
Məhərrəm Əliyev və Zakir Həsənov cəbhənin Talış kəndi istiqamətindəki döyüş mövqelərində xidmət edən hərbi qulluqçularla görüşüb onların xidmət şəraiti ilə maraqlanıblar.
Tank bölmələrində də olan Məhərrəm Əliyev və Zakir Həsənov sonda hərbi qulluqçularla nahar süfrəsində bir araya gəliblər.
