Nazirlər Kabineti yanında operativ qərargahın 29 aprel məlumatına görə, Azərbaycanda daha 49 nəfərin koronavirus infeksiyasına yoluxması qeydə alınıb, 46 nəfər sağalaraq xəstəxanadan buraxılıb, 1944-cü il təvəllüdlü bir xəstə vəfat edib.

Ümumilikdə ölkədə 1766 nəfərin koronavirusa yoluxmasının müəyyən edildiyi, onların 1267-nin müalicə olunaraq sağaldığı, 23-nün vəfat etdiyi bildirilir.

Rəsmi hesabata əsasən, 476 nəfərin xüsusi rejimli xəstəxanalarda müalicəsi davam etdirilir, həmin şəxslərdən 18-nin vəziyyəti ağırdır.

2019-cu ilin dekabrında Çində üzə çıxan pnevmoniya tipli koronavirus xəstəliyi 210 ölkə və əraziyə yayılıb, 219 mindən çox adam ölüb.

Azərbaycanda infeksiyanı cilovlamaq məqsədilə xüsusi karantin rejimi tətbiq olunub: sərhədlər qapadılıb, təhsil ocaqları, mədəniyyət və idman obyektləri, ictimai iaşə müəssisələri, bir çox ticarət və məişət xidməti məkanı bağlanıb, toy və şənlik məclisləri, dəfn istisna olmaqla yas mərasimlərinin keçirilməsi yasaqlanıb, ölkə ərazisində gediş-gəlişə, ictimai nəqliyyatın hərəkətinə, insanların evdən çıxmasına məhdudiyyət qoyulub.

Xüsusi karantin rejimi mayın 4-də başa çatmalıdır. Ancaq rəsmi açıqlamaya görə, Azərbaycanın dövlət sərhədində giriş-çıxışa tətbiq olunan məhdudiyyət 31 mayadək uzadılıb.

Beynəlxalq statistikaya əsasən, Azərbaycanla həmsərhəd İranda 5957, Türkiyədə 2992, Rusiyada 972, Gürcüstanda 6 nəfər koronavirusun qurbanı olub.