Fərəc Quliyevə xəbərdarlıq qərarı
Mərkəzi Seçki Komissiyası fevralın 9-da keçiriləcək parlament seçkisində 31 saylı Suraxanı dairəsindən namizədlər Mehman Hüseynov, Orxan Kəngərli və Etibar Əliyevin müraciətlərinə baxıb. Müraciətlər qismən təmin olunaraq həmin dairədən namizəd, Milli Dirçəliş Hərəkatı Partiyasının sədri, parlamentin deputatı Fərəc Quliyevə xəbərdarlıq edilib (Qərar).
Mərkəzi Seçki Komissiyasına müraciətlərdə Fərəc Quliyevin seçkiqabağı təşviqat dövründə Mehman Hüseynovu seçkidə iştirakdan çəkindirməklə əlaqədar hərəkətləri mübahisələndirilib və tədbir görülməsi xahiş olunub.
Əsas şikayətçi olan bloqçu Mehman Hüseynov müraciətində qeyd edib ki, Fərəc Quliyev ona zəng vuraraq görüşmək istədiyini bildirib. Bloqçu Fərəc Quliyevin seçki qərargahına getdiyini, söhbət zamanı deputatın ona namizədliyini geri götürəcəyi təqdirdə 15 min manat pul təklif etdiyini, gələcəkdə ona hər cür dəstək olacağını, gənclər təşkilatı, QHT yaratmağa kömək göstərəcəyini vəd etdiyini vurğulayıb. Mehman Hüseynov həmin danışıqların audio yazısını internetdə yayıb, Fərəc Quliyevin digər namizədlərin konstitusiya və Seçki Məcəlləsi ilə təsbit edilmiş hüquqlarının kobud şəkildə pozduğunu, seçkinin nəticələrinə təsir məqsədi güdən qanunsuz əməllərə yol verdiyini iddia edib, onun namizədliyinin ləğv olunmasını istəyib.
MSK-nın qərarında qeyd olunur ki, Fərəc Quliyev araşdırmaya dəvət olunub və müvafiq izahat verib: “Fərəc Quliyev Mehman Hüseynovla görüşdüyünü təsdiq edib, şikayətçi ilə aralarında olan söhbətin təxminən 40 dəqiqə davam etdiyini göstərib, Mehman Hüseynovun həmin söhbətin audio yazısını montaj edərək təxminən 5-6 dəqiqəlik səs yazısını yaydığını bildirib, seçki qanunvericiliyinin, həmçinin qanunların pozulmasına yönələn hər hansı bir hərəkətə yol verilmədiyini qeyd edib. O, seçkidən çəkilmək üçün Mehman Hüseynova rüşvət təklif etmədiyini, şikayətçinin xəstəlikdən əziyyət çəkdiyini və analiz verdiyini, cavab müsbət olmazsa, seçkidən çəkilərək müalicəyə gedəcəyini bildirdiyini vurğulayıb və qeyd edib ki, müalicə olunacağı təqdirdə dostlarına da çağırış edərək Mehman Hüseynova müəyyən maddi köməklik göstərəcəyini bildirib”.
1989-cu il təvəllüdlü Mehman Hüseynov 2017-2019-cu illərdə polisə ağır cinayət ittihamı ilə böhtan atmaq ittihamı ilə həbsdə yatıb.
9 fevral seçkisində Mehman Hüseynov “Hərəkət” seçki blokunu təmsil edir. “Hərəkət” blokunda gənclər, siyasətçilər, vəkillər, jurnalistlər, ictimai fəallar təmsil olunur.
