Dekabrın 26-da İraq prezidenti Bərham Saleh parlamentə müraciət edərək istefa verdiyini açıqlayıb. Qərar ölkədə oktyabr ayının əvvəllərindən dərinləşən ictimai-siyasi böhrandan doğur. Səngimək bilməyən xalq etirazlarında 500 nəfərə yaxın adam həlak olub. Noyabrın sonunda baş nazir Adil Əbdül Mehdi istefa verib, ancaq sakitlik yaranmayıb və yeni hökumət qurmaq mümkün olmayıb.

Novator.az bildirir ki, Bərham Saleh 1960-cı ildə Süleymaniyyə şəhərində doğulub. Kürddür.

16 yaşında Kürdüstan Vətənpərvərlər İttifaqının üzvü olub. 18 və 19 yaşlarında kürd milli hərəkatında iştirakına görə iki dəfə həbsdə yatıb.

Bərham Saleh Böyük Britaniyada Kardiff Universitetinin aspiranturasını (mülki tikinti sahəsi üzrə) və Liverpul Universitetinin doktoranturasını (statistika və kompüter texnologiyaları üzrə) bitirib.

Uzun illər Böyük Britaniyada yaşayıb, Kürdüstan Vətənpərvərlər İttifaqının bu ölkədəki nümayəndəsi olub.

2001-2004-cü illərdə İraqdakı Kürdüstan bölgə hakimiyyətinin baş naziri postunu tutub. 2004-cü ildən İraq hökumətində əvvəl baş nazirin müavini, sonra planlaşdırma naziri vəzifələrində çalışıb, 2005-ci ildə parlamentin deputatı seçilib. 2009-2012-ci illərdə İraq Kürdüstanı hökumətinə başçılıq edib.

2018-ci il oktyabrın 2-də İraq parlamentinin 219 deputatının səsi ilə prezident seçilib.