Sərmayə və ticarət yenilikləri
Dövlət Statistika Komitəsi yeni hesabatlar açıqlayıb. Novator.az bildirir ki, rəsmi məlumata görə, 2019-cu ilin yanvar-noyabr aylarında Azərbaycanda iqtisadi və sosial sahələrə 12 milyard 786,9 milyon manat vəsait yönəldilib, sərmayənin 65,7 faizi məhsul istehsalı sahələrinə, 24,9 faizi xidmət sahələrinə, 9,4 faizi yaşayış evlərinin tikintisinə sərf olunub.
Əsas kapitala yönəldilmiş vəsaitdə daxili mənbələrin payı 70,5 faiz göstərilir.
Hesabata əsasən, sərmayənin 56 faizi müəssisə və təşkilatların vəsaitləri, 27,2 faizi büdcə vəsaitləri, 7,7 faizi bank kreditləri, 6,6 faizi əhalinin şəxsi vəsaitləri olub.
Başqa bir açıqlamada qeyd olunur ki, 2019-cu ilin yanvar-oktyabr aylarında Azərbaycanın hüquqi və fiziki şəxsləri 190 ölkədəki tərəfdaşları ilə ticarət əməliyyatları həyata keçirib, 117 ölkəyə məhsul ixrac olunub, 180 ölkədən məhsul alınıb.
10 ayda ölkənin xarici ticarət dövriyyəsi 27 milyard 436,7 milyon ABŞ dolları, o cümlədən ixracın dəyəri 15 milyard 981,4 milyon dollar, idxalın dəyəri 11 milyard 455,3 təşkil edib, 2018-ci ilin yanvar-oktyabr ayları ilə müqayisədə xarici ticarət dövriyyəsi real ifadədə 1,3 faiz, o cümlədən idxal 2,8 faiz, ixrac 0,5 faiz azalıb.
10 ayda ölkədən 1 milyard 572,9 milyon dollar dəyərində qeyri neft-qaz məhsulları ixrac edildiyi vurğulanır.
