Dövlət Miqrasiya Xidməti 2019-cu ilin noyabr ayının hesabatını verib. Rəsmi məlumata görə, ay ərzində əcnəbilərin və vətəndaşlığı olmayan şəxslərin olduğu yer üzrə qeydiyyatı ilə bağlı 49697 müraciət qeydə alınıb.

Ölkədə müvəqqəti olma müddətinin uzadılması, müvəqqəti və daimi yaşamaq üçün icazələrin alınması, vətəndaşlığa qəbul, bərpa, vətəndaşlıqdan çıxma, eləcə də vətəndaşlıq mənsubiyyətinin və qaçqın statusunun müəyyənləşdirilməsi, əmək fəaliyyətinin həyata keçirilməsi icazələri yönündə 7794 müraciətin daxil olduğu bildirilir.

Hesabata əsasən, noyabr ayında qanunvericiliyin tələblərinin pozulması ilə əlaqədar 1398 qərar çıxarılıb. Qərarların 719-da inzibati cərimə, 624-də ölkə ərazisinə girişə məhdudiyyət rəsmiləşib, 24-də müvəqqəti və daimi yaşamaq üçün icazə vəsiqələrinin itirilməsinə, 10-da qeydiyyat üzrə tədbirlərin görülməməsinə, 19-da əcnəbilərin və vətəndaşlığı olmayan şəxslərin işə cəlb edilməsi qaydasının pozulmasına görə məsuliyyət nəzərdə tutulub, 2 qərar qanunvericiliyin digər müddəalarının tələblərinin pozulmasını əhatə edib.