Nə qədər yatmaq xeyirlidir?
Normal yuxu rejiminə riayət etməmək ürəkdə problem yarada bilər. Novator.az-ın məlumatına görə, Kolorado Universiteti (ABŞ) alimlərinin 7 illik tədqiqatı belə nəticə ortaya qoyub. Mütəxəssislər hesab edir ki, yuxusuzluq hətta idmanla məşğul olan və düzgün həyat tərzi keçirən insanlarda da problemə gətirib çıxarır.
Ekspertlər heç vaxt ürək tutması keçirməyən 40-69 yaşlı 461 min insanın yuxu rejimini, irsi məlumatlarını və tibbi göstəricilərini araşdırıblar. 7 il çəkən tədqiqat göstərib ki, sutkada 6 saatdan az yatan insanlarda infarkt riski 6-9 saat yuxu rejimi olan insanlarla müqayisədə 20 faiz çoxdur.
Yuxuya 9 saatdan artıq vaxt sərf edən adamlarda isə infarkt ehtimalı 34 faiz yüksək olur.
Alimlər hesab edirlər ki, sutkada 6-9 saatlıq yuxu norması ürək xəstəliyi ehtimalı yüksək olan insanlarda infarkt riskini 18 faiz azaldır.
Yuxusuzluq həmçinin qan və ya limfa damarlarının selikli qişasına, habelə sümük iliyində iltihablı hüceyrələrin inkişafına təsir edə bilər. Uzunmüddətli yuxu da orqanizmdə iltihabın yaranmasına gətirir.
Səidə Hüseynova
