Aşqabad səfərində olan prezident İlham Əliyev oktyabrın 10-da türkmənistanlı həmkarı Qurbanqulu Berdiməhəmmədovla bir araya gəlib. AZƏRTAC-ın məlumatına görə, İlham Əliyev Türkmənistana keçənilki səfərini xatırladıb: “O vaxt biz rekord göstərdik, 20-dən çox sənəd imzaladıq. Bu, iki qonşu ölkə arasında münasibətlərin xarakterini və ruhunu əks etdirir”.

Prezident MDB dövlət başçılarının 11 oktyabr sammitinin çoxtərəfli əməkdaşlığın daha da möhkəmlənməsi üçün böyük əhəmiyyət kəsb etdiyini vurğulayıb: “Bu mühüm beynəlxalq tədbirin gözəl təşkili münasibətilə Sizi təbrik etmək istərdim”.

İlham Əliyev həmin gün Moldova prezidenti İqor Dodonla da görüşüb. O deyib ki, iki ölkənin fəal əməkdaşlıq edə biləcəyi mövzular, sahələr çoxdur: “Ölkələrimiz arasında dostluq münasibətləri həm ticari-iqtisadi sahədə, həm investisiya sferasında və bütün başqa sahələrdə qarşılıqlı fəaliyyəti inkişaf etdirmək üçün yaxşı bazadır. Moldova bizə yaxın, dost dövlətdir”.

İlham Əliyev Türkmənistana Müstəqil Dövlətlər Birliyinin (MDB) sammitinə – Dövlət Başçıları Şurasının iclasına qatılmaq üçün gedib.

1991-ci ildə yaradılmış MDB-yə Rusiya, Belarus, Moldova, Azərbaycan, Ermənistan, Qazaxıstan, Özbəkistan, Türkmənistan, Qırğızıstan və Tacikistan daxildir.