Siftə 7-cidə gəldi
Azərbaycanın milli futbol komandası oktyabrın 9-u səfərdə Bəhreyn yığması ilə yoldaşlıq oyununda 3:2 hesabı ilə qalib gəlib.
Novator.az bildirir ki, bu, Azərbaycan və Bəhreyn millilərinin üçüncü yoldaşlıq görüşü olub. Azərbaycan milli komandası əvvəlki oyunlarda da rəqibini üstələyib (2008-ci il oktyabrın 15-i səfərdə 2:1 və 2012-ci il avqustun 15-i evdə 3:0).
9 oktyabr matçı 2019-cu il fevralın 11-də milli komandanın baş məşqçisi təyin edilən xorvatiyalı Nikola Yurçeviçin rəhbərliyi altında 7-ci oyun və ilk qələbə kimi tarixə düşüb. Milli komanda Avropa çempionatının seçmə mərhələsində Xorvatiya ilə evdə 1:1, səfərdə 1:2, Macarıstanla evdə 1:3, Slovakiya ilə evdə 1:5, Uelslə səfərdə 1:2 hesablarına imza atıb, evdə Litva ilə yoldaşlıq oyununda 0:0 hesabı qeydə alınıb.
Nikola Yurçeviç 1966-cı ildə Xorvatiyanın paytaxtı Zaqrebdə doğulub. Yerli “Dinamo” və “Zaqreb”, Belçikanın “Antverpen”, Avstriyanın “Zalsburq”, Almaniyanın “Frayburq” klublarında və Xorvatiya milli komandasında yarımmüdafiəçi mövqeyində çıxış edib.
“Zaqreb”, “Dinamo”, “Zalsburq”, “Slaven” (Xorvatiya) klublarında baş məşqçi, “Lokomotiv” (Moskva, Rusiya), “Beşiktaş” (Türkiyə), “Vest Hem” (İngiltərə) klublarında və Xorvatiya yığmasında baş məşqçinin köməkçisi olub.
