Müsavatın 9-cu qurultayı oktyabrın 13-ü Bakının 7-ci mikrorayonundakı “Büllur” sarayında keçiriləcək. Novator.az-ın məlumatına görə, müsavatçıların paytaxtın icra hakimiyyəti və “Büllur” sarayı nümayəndələri ilə danışıqlarında belə razılaşma əldə olunub.
Partiya qurultayı oktyabrın 12-də keçirməyi nəzərdə tuturdu. Həmin günə “Büllur” sarayına başqa bir mərasim təyin olunduğu üçün Müsavat günü dəyişməyə qərar verib.
Müsavat başqanı Arif Hacılı sentyabr ayında Bakı Şəhər İcra Hakimiyyətinin başçısı Eldar Əzizova rəsmi müraciət edərək partiyanın qurultayına yer ayrılmasını istəmiş, 400-500 nəfərlik bu tədbir üçün Rəşid Behbudov adına Dövlət Mahnı Teatrının və ya Abbas Mirzə Şərifzadə adına Mədəniyyət Evinin daha münasib olduğunu bildirmişdi. Sonradan partiya mərkəzi qərargahına yaxın olan “Büllur” sarayında da qurultay keçirməyə hazır olduğunu bəyan etmişdi.
Bakı Şəhər İcra Hakimiyyəti Müsavatın müraciətini oktyabrın 7-də cavablandırıb sahibi ilə müvafiq razılıq əldə ediləcəyi təqdirdə qurultayın “Büllur” sarayında keçirilməsini məsləhət bilmişdi. Ancaq Bakı Şəhər İcra Hakimiyyətinin rəsmi cavabı açıqlanandan az sonra “Büllur”un müsavatçılara yer ayırmaqdan imtina etdiyi üzə çıxmışdı.
Yenidən Bakı Şəhər İcra Hakimiyyətinə səslənən Müsavat Partiyası qurultaya yer ayrılmasında təkid edib və aparılan danışıqlarda “Büllur”un rəhbərliyi əvvəlki mövqeyindən geri çəkilib.
9-cu qurultayda partiya başqanı, Məclisin sərbəst üzvləri və Mərkəzi Nəzarət-Təftiş Komissiyası seçilməlidir. Başqan postuna partiyanın indiki lideri Arif Hacılı və Divan üzvləri Tofiq Yaqublu ilə Yadigar Sadıqov namizəddir.
1911-ci ildə yaradılan Müsavat Partiyasının ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran, beşinci başqanı İsa Qəmbərdir.
2014-cü ildə keçirilən 8-ci qurultaydan bəri partiyaya Arif Hacılı başqanlıq edir.