Milli Şuraya yaşıl işıq
Bakı Şəhər İcra Hakimiyyəti Demokratik Qüvvələrin Milli Şurasının 8 oktyabr piketinə razılıq verib. Aksiya saat 15-dən 16-dək Bakı Şəhər İcra Hakimiyyəti və Azərbaycan Dövlət İqtisad Universitetinin binaları arasında keçiriləcək.
Milli Şuranın fəaliyyətinə rəhbərlik edən Koordinasiya Mərkəzinin üzvü, AXCP sədri Əli Kərimli Facebook.com-da bəyan edib ki, aksiyada sərbəst toplaşmaq hüququnun təmin olunması tələbi qoyulacaq: “Bu aksiyaya razılıq verən hakimiyyət məntiqlə Bakı şəhərinin uyğun meydanlarında mitinqlərə də razılıq verməlidir. Mitinq keçirmək, hökumətə dinc etiraz etmək xalqımızın haqqıdır. Bu haqqı alacağıq”.
2013-cü ildə yaradılmış Milli Şuraya tarix elmləri doktoru Cəmil Həsənli sədrlik edir.
Novator.az bildirir ki, 2013-cü ildən Bakıda mitinqlər Yasamal rayonundakı İdman-Sağlamlıq Kompleksinin stadionunda (metronun “İnşaatçılar” stansiyasının yaxınlığı) keçirilib. Burada sonuncu mitinq 2019-cu il yanvarın 19-da olub. Həmin mitinqi Milli Şura keçirib. Bundan sonra Bakı Şəhər İcra Hakimiyyəti müxtəlif təşkilatlara (Milli Şura, Müsavat Partiyası, Qarabağ Komitəsi, Azərbaycan Xalq Hərəkatı) orada, eləcə də paytaxtın başqa məkanlarında aksiya keçirmək icazəsi verməyib.
Sentyabrın 10-da Yasamal Rayon İcra Hakimiyyəti İdman-Sağlamlıq Kompleksində əsaslı təmir işlərinə başlandığını bəyan edib.
Milli Şura sentyabrın 28-nə təyin etdiyi mitinq üçün Bakı Şəhər İcra Hakimiyyətindən üç ünvan istəyib: “28 May” metro stansiyasının qarşısındakı meydan, Tofiq Bəhramov stadionunun qarşısındakı meydan və “Nəriman Nərimanov” metro stansiyasının yanındakı park.
Paytaxt rəhbərliyi bu ərazilərin nəqliyyatın sıx hərəkət etdiyi məkanlar olduğunu əsas gətirərək Milli Şuraya mitinqi Qaradağ rayonunun Lökbatan qəsəbəsində, “Neftçi” İdman Klubu Birliyinin Qaradağ Təlim-İdman Bazasının stadionunda (28 May küçəsi) keçirməyi məsləhət görüb. Təklifdən imtina olunub, mitinq təxirə salınıb. Milli Şura gediş-gəlişin rahat olduğu meydan istəyir və 8 oktyabr piketini də bu tələblə keçirmək qərarına gəlib.
