UEFA Avropa Liqasının qrup mərhələsində Azərbaycanı təmsil edən “Qarabağ” komandası ikinci oyununu keçirib. Novator.az-ın məlumatına görə, A qrupunda yarışan “Qarabağ” oktyabrın 3-ü Lüksemburqda yerli “Düdelanj”ı 4:1 hesabı ilə yenərək ikinci pilləyə yüksəlib.

Oyunun birinci hissəsində, “Qarabağ”ın ikinci qolundan sonra stadionda işğalçı Dağlıq Qarabağ rejiminin bayrağı taxılmış dron uçurulub. Azərbaycan komandası və “Qarabağ”ın azarkeşləri buna kəskin etiraz ediblər, matçda fasilə yaranıb. Görüş Lüksemburqun idman naziri üzrxahlığını çatdırdıqdan sonra davam etdirilib.

AFFA rəhbərliyinin və “Qarabağ” klubu rəsmilərinin UEFA-ya bu qalmaqalla bağlı rəsmi müraciət edəcəyi bildirilir.

Qrupun digər oyununa gəlincə, Kiprin APOEL komandası İspaniya səfərində “Sevilya”ya uduzub – 0:1.

1/16 finala qrupda ilk iki yeri tutan komandalar çıxacaq. İki turdan sonra “Sevilya”nın 6, “Qarabağ” və “Düdelanj”ın 3 xalı var. APOEL xalsızdır.

Qrupun qalan oyunları:

24 oktyabr

“Sevilya” – “Düdelanj”

“Qarabağ” – APOEL

7 noyabr

“Düdelanj” – “Sevilya”

APOEL – “Qarabağ”

28 noyabr

“Sevilya” – “Qarabağ”

“Düdelanj” – APOEL

12 dekabr

APOEL – “Sevilya”

“Qarabağ” – “Düdelanj”.

Qrup raundunda oynayan 48 komandadan 8-i əvvəllər Avropa Liqasının qalibi olub. 1971-ci ildən keçirilən, 2008-cı ilədək UEFA kuboku adlanmış turnirdə “Sevilya” 5, “Feyenoord”, “Borussiya” (Mönhenqladbah), “Portu” 2, PSV, “Ayntraxt” (Frankfurt), SSKA (Moskva), “Mançester Yunayted” 1 uğur əldə edib.