Rusiya: yaşlı adam internetdə nə axtarır?
Rusiyanın Federal Statistika Xidməti 55 yaşdan yuxarı şəxslərin internetdən istifadə dərəcəsini araşdırıb. Novator.az-ın məlumatına görə, rəsmi sorğu göstərib ki, yaşı 55-i keçmiş rusiyalıların yarısı internetdən yararlanır, onların üçdə biri fəal istifadəçidir.
Araşdırmanın nəticələrinə əsasən, yaşlı respondentlərin 57%-i sosial şəbəkələrdə ünsiyyət qurur, 49%-i səhhətlə bağlı informasiya axtarır, 46%-i zəng və video əlaqəsi alətlərindən istifadə edir, 45%-i mal və xidmətlər haqda məlumatları araşdırır.
Respondentlərin 10%-i internetdən mal və xidmət sifariş vermək üçün yararlandığını deyib.
İnternet xidmətləri arasında maliyyə əməliyyatları, o cümlədən bank xidmətləri, pul köçürmələri, sığorta xidmətləri, qiymətli kağızlarla əməliyyatlar (46%), paltar və ayaqqabı alışı (36%), həmçinin ev əşyalarının (26%) alışı daha populyardır.
55 yaşdan yuxarı insanların dörddə birindən çoxu internetə səhiyyə xidmətlərinin (35%), vergi və rüsumların (17%), habelə mənzil-kommunal xərclərinin (14%) ödənişi üçün baş vurur.
Səidə Hüseynova
