Hökumət 2020-ci il yanvarın 1-dən avtomobil nəqliyyatı vasitələrinə texniki baxış rüsumunu 20 manatdan 30 manata qaldırmaq təklifi ilə çıxış edib. Novator.az-ın məlumatına görə, iqtisadçı ekspert Natiq Cəfərli bununla bağlı şərhində yazır: “Hökumət bütün sahələrdə olduğu kimi bu məsələdə də işin fəlsəfəsini, məğzini anlamır, ancaq rüsum qaldırmaqla kifayətlənir. Texniki baxış ölkədə çoxdan tam formal bir işdir, hökumət heç özünə sual verirmi ki, texniki nasazlığa görə baş verən qəzalar azalır, ya yox? Yoxsa əsas məsələ pul yığmaqdır? Nədən dövlət qurumu bu sahədə inhisarçı olmalı, nə səbəbə sürücülər texniki baxış üçün ancaq bir yerə getməli, saatlarla zaman xərcləməlidirlər?

Gürcüstanda 89 şirkət texniki baxış keçirmək üçün lisenziya alıb, sürücü bu obyektlərin istənilən birinə gedib doğrudan da texniki baxışdan keçir, özü də bu proses zamanı ödəniş nağd qəbul edilmir, ancaq xüsusi hesaba pul keçirilir, növbələr olmur, maşında texniki nasazlıq olanda mütləq aradan qaldırılması tələb olunur. Beləliklə, texniki baxış sürücüyə də, biznesə də, dövlətə də xeyir verir, qəzaların azalmasına, biznesin inkişafına xidmət edir.

Hökumət anlamalıdır ki, texniki baxış pul yığmaq üsulu deyil, qəzaların azaldılması üçün profilaktik addımdır və bunu Daxili İşlər Nazirliyi yox, dövlətdən müvafiq lisenziya alan biznes qurumları həyata keçirməlidir. Bu işi biznes görsə, daha diqqətli və tələbkar olacaq, texniki nasazlığa göz yummayacaq, çünki təsbit edilmiş problemləri ayrıca həll edib pul qazanmaq marağı yaranacaq.

Hökumət hələ də insanı sovetdən qalma alışqanlıqla idarə etməyə çalışır, halbuki ən effektiv yol insanın özünü deyil, marağını ağılla və ədalətli idarə etməkdir”.