Baş redaktor nazirliyi məhkəməyə verib
Arqument.az saytının baş redaktoru Şəmşad Ağa Nəqliyyat, Rabitə və Yüksək Texnologiyalar Nazirliyini məhkəməyə verib.
Toplum.tv-nin məlumatına görə, baş redaktor bildirib ki, şikayətə səbəb bu ilin aprelində heç bir xəbərdarlıq edilmədən 2 gün ərzində Arqument.az saytına girişə məhdudiyyət qoyulmasıdır.
Şəmşad Ağa sayta müdaxilənin Cəlilabadda bir qrup fermerin etiraz aksiyası haqda xəbərlə bağlı olduğunu düşünür. Onun sözlərinə görə, həmin aksiya barədə ilk məlumatı Arqument.az yayıb.
Sentyabrın 27-də Bakı İnzibati-İqtisadi Məhkəməsində Şəmşad Ağanın şikayəti üzrə hazırlıq iclası keçirilməlidir.
2017-ci il martın 17-də “İnformasiya, informasiyalaşdırma və informasiyanın mühafizəsi haqqında” qanuna dəyişikliklər təsdiqlənib, nəticədə Rabitə və Yüksək Texnologiyalar Nazirliyi saytlara girişi məhdudlaşdırmaq səlahiyyəti qazanıb.
2018-ci il avqustun 8-də Səbail Rayon Məhkəməsi nəqliyyat, rabitə və yüksək texnologiyalar nazirinin iddiası əsasında Arqument.az saytını bloklamışdı. Avqustun 10-da Bakı Apellyasiya Məhkəməsi Səbail məhkəməsinin qərarını ləğv etmişdi. Həmin vaxt bu, sayt üzərinə qoyulan blokun ləğvi istiqamətində Azərbaycan məhkəmələrində çıxarılan ilk qərar idi.
Arqument.az saytı 2014-cü ildən fəaliyyət göstərir.
