Maliyyə Monitorinqi Xidmətinin rəhbəri kimdir?
Rövşən Çingiz oğlu Nəcəf Maliyyə Monitorinqi Xidmətinin İdarə Heyətinin sədri təyin edilib. Sərəncamı prezident İlham Əliyev imzalayıb.
Novator.az bildirir ki, Maliyyə Monitorinqi Xidməti 2018-ci il mayın 25-də, cinayət yolu ilə əldə edilmiş pul vəsaitlərinin və ya digər əmlakın leqallaşdırılmasının və terrorçuluğun maliyyələşdirilməsinin qarşısını almaq sahəsində vahid tənzimləməni və nəzarəti həyata keçirən, fəaliyyəti əlaqələndirən publik hüquqi şəxs kimi yaradılıb. Qurum pul vəsaitləri və ya digər əmlakla əməliyyat aparılmasını dayandırmaq, müvafiq sahədə icrası məcburi olan qərarlar qəbul etmək və göstərişlər vermək hüququ alıb.
Prezidentin 30 may 2019-cu il sərəncamı ilə Maliyyə Monitorinqi Xidməti Vergilər Nazirliyinin tərkibinə verilir.
Rövşən Nəcəf 1982-ci ildə Bakı şəhərində doğulub. Azərbaycan Dövlət İqtisad Universitetinin beynəlxalq iqtisadi münasibətlər fakültəsini bitirib, ABŞ-ın Kolumbiya Universitetində magistr proqramı üzrə təhsil alıb. İqtisadiyyat üzrə fəlsəfə doktorudur.
Azərbaycan Dövlət İqtisad Universitetində laborant, İqtisadi İnkişaf Nazirliyində məsləhətçi, baş məsləhətçi, sektor müdiri, SOCAR-da iqtisadçı, şöbə rəisi vəzifələrini tutub.
İqtisadi İnkişaf Nazirliyində xarici iqtisadi əlaqələr şöbəsinin müdir müavini, müdiri, nazirin köməkçisi vəzifələrində də çalışan Rövşən Nəcəf həmçinin “Azərbaycan İnvestisiya Şirkəti” ASC-nin icraçı direktorunun müavini, icraçı direktoru olub.
Rövşən Nəcəf 11 may 2018-ci ildən 28 avqust 2019-cu ilədək Prezident Administrasiyasının innovativ inkişaf və elektron hökumət məsələləri şöbəsinin müdiri postunda çalışıb.
