Platini nəyin güdazına gedir?
UEFA-nın sabiq prezidenti Mişel Platini iyunun 18-i həbs edilib. Paris yaxınlığındakı Nanter şəhərinin məhkəmə polisinin antikorrupsiya idarəsinə aparılan Mişel Platini 2022-ci ilin dünya futbol çempionatının Qətərə verilməsinə görə rüşvət almaqda şübhəli bilinir.
Novator.az bildirir ki, FİFA-nın Etika Komitəsinin Arbitraj Palatası 2015-ci il dekabrın 21-də Mişel Platinini korrupsiya qalmaqalına görə 8 il müddətinə futbol fəaliyyətindən uzaqlaşdırıb. Sonradan cəza 4 ilə endirilib. 2016-cı ildə Mişel Platini UEFA prezidenti vəzifəsindən istefa verib. O, təşkilata 2007-ci ildən rəhbərlik edirdi.
Qətər 2022-ci ilin dünya çempionatını keçirmək hüququnu 2010-cu ildə əldə edib. Onun əsas rəqibi ABŞ olub. FİFA İcraiyyə Komitəsində keçirilən həlledici səsvermədə UEFA nümayəndələri Qətəri dəstəkləyib.
Futbol fəaliyyətinə qadağa qoyulmuş FİFA-nın sabiq prezidenti Yozef Blatter 2015-ci il oktyabrın 30-u “Financial Times” qəzetinə müsahibəsində demişdi ki, 2010-cu ildə FİFA-da 2018-ci il çempionatının ev sahibliyi hüququnun Rusiyaya, 2022-ci il çempionatının isə ABŞ-a verilməsi ilə bağlı centlmen razılaşması olub, ancaq UEFA prezidenti Mişel Platini mövqeyini qəfil dəyişib deyə ABŞ 2022-ci il çempionatına sahib ola bilməyib, ev sahibliyi Qətərə verilib.
FİFA prezidenti demişdi ki, Mişel Platini mövqeyini 2010-cu ildə Fransa prezidenti postunu tutan Nikola Sarkozinin təsiri ilə dəyişib. Yozef Blatterin sözlərinə görə, UEFA-nın 4 səsinin ABŞ-dan Qətərə keçməsi ilə əvvəlki razılaşma pozulub.
1955-ci il təvəllüdlü Mişel Platini dünyanın ən məşhur futbolçularından biridir. Fransanın “Nansi”, “Sent-Etyenn”, İtaliyanın “Yuventus” klublarında oynayıb, 1976-1986-cı illərdə Fransa milli komandasının şərəfini qoruyub.
Avropa çempionu, Kuboklar kubokunun, Çempionlar kubokunun, Avropa superkubokunun, qitələrarası kubokun qalibidir.
1983, 1984, 1985-ci illərdə Avropanın ən yaxşı futbolçusu seçilərək “Qızıl top” mükafatı alıb.
