Ziyarətin cəriməsi
Müsavat Partiyası və Demokratik Qüvvələrin Milli Şurası mayın 28-i Abşeronun Novxanı qəsəbəsində Respublika Gününə həsr olunmuş yürüş-mitinqlər keçirib. Novxanının girişindən Azərbaycan Xalq Cümhuriyyətinin qurucu lideri Məhəmməd Əmin Rəsulzadənin qəsəbədəki heykəlinə doğru keçirilən yürüşlərə polis müdaxilə edib. Müsavat Partiyasının yürüşündə 4 nəfər, Milli Şurasının yürüşündə 8 nəfər tutulub. “Turan”ın məlumatına görə, Müsavatın Cəlilabad təşkilatının üzvləri olan 4 nəfər inzibati cəza tətbiq edilmədən sərbəst buraxılıb.
Milli Şuranın yürüşündə tutulan 8 nəfər buraxılsa da, onların işi məhkəməyə göndərilib. Mayın 30-da Abşeron Rayon Məhkəməsi Milli Şuranın Koordinasiya Mərkəzinin üzvü Tofiq Yaqublu, AXCP üzvləri Bəxtiyar Hüseynov, Şakir Əhmədov, bitərəf Mirzə Aydına 300 manat məbləğində cərimə kəsib. Aksiyaçılar toplantıların təşkili və keçirilməsi qaydasını pozmaqda təqsirli biliniblər.
Mayın 31-də Abşeron Rayon Məhkəməsi AXCP üzvləri Adil Babayev, Nizami Abbasov, Ruslan Şərifov və Elşən Həsənovu da eyni ittihamla 300 manat cərimələyib.
