Azərbaycana rəsmi səfərə gələn Polşa prezidenti Anjey Duda mayın 31-i Bakıda rəsmən qarşılanıb. AZƏRTAC xəbər verir ki, Azərbaycanın dövlət və hökumət nümayəndələri Anjey Dudaya, Polşa nümayəndə heyətinin üzvləri prezident İlham Əliyevə təqdim olunub.

Rəsmi qarşılanma mərasimindən sonra İlham Əliyev Anjey Duda ilə təkbətək görüşüb. Ardınca dövlət başçıları nümayəndə heyətlərinin iştirakı ilə geniş tərkibdə bir araya gəliblər.

Daha sonra İlham Əliyevin və Anjey Dudanın iştirakı ilə bu sənədlər imzalanıb: “Azərbaycan Respublikasının Qida Təhlükəsizliyi Agentliyi ilə Polşa Respublikasının Bitki Mühafizəsi və Toxumçuluq üzrə Dövlət Müfəttişliyi arasında fitosanitariya sahəsində əməkdaşlıq haqqında anlaşma memorandumu”; “Azərbaycan Respublikasının Kənd Təsərrüfatı Nazirliyi ilə Polşa Respublikasının Kənd Təsərrüfatı və Kəndin İnkişafı Nazirliyi arasında əməkdaşlıq haqqında anlaşma memorandumu”; “Azərbaycan Respublikası Hökuməti ilə Polşa Respublikası Hökuməti arasında məxfi məlumatların mübadiləsi və qarşılıqlı mühafizəsi haqqında saziş”.

Sənədlərin imzalanması mərasimindən sonra prezidentlər mətbuata bəyanatlarla çıxış ediblər.

Həmin gün Heydər Əliyev Mərkəzində Azərbaycan-Polşa biznes forumu keçirilib. Biznes forumuna İlham Əliyevlə Anjey Duda da qatılıblar.