Bakıda yeni bağ
Prezident İlham Əliyev və xanımı Mehriban Əliyeva mayın 22-si Bakının Yasamal rayonu ərazisində yerləşən Təzəpir məscidinin qarşısındakı bağın və Füzuli küçəsi boyunca salınmış Mərkəzi Parkın açılışında iştirak ediblər.
AZƏRTAC-ın arayışına görə, “Sovetski” kimi tanınan ərazidə 2013-cü ilin noyabr ayında başlayan abadlıq və yenidənqurma işləri mərhələlərlə icra olunur. Avstriyalı memar Yans Hoffmanın layihələndirdiyi Mərkəzi Park Nəriman Nərimanov prospektindən Heydər Əliyev Sarayınadək olan ərazidə piyadalara yol keçmədən maneəsiz hərəkət imkanı yaradır.
Dövlət başçısına Hüseyn Cavid parkı-Nərimanov prospekti ilə bağlantı yolu və Cavanşir yol ötürücüsünün yerində inşa olunacaq yol qovşağının tikintisi layihəsi barədə də məlumat verilib.
Mərkəzi Parkın ərazisində 2 kafe də fəaliyyət göstərəcək. Bu istirahət məkanında yeraltı və yerüstü piyada keçidləri istifadəyə verilib. Ərazidə 7 istirahət və oyun meydançası yaradılıb.
Görülən işlər çərçivəsində Təzəpir məscidinin qarşısındakı bağdan məscidə əlavə giriş imkanı da olacaq. Həmçinin Füzuli meydanı ətrafındakı ərazi yenidən qurulub, burada əhalinin təhlükəsiz hərəkəti üçün piyada keçidinə yeni giriş yaradılıb. Parkın ərazisində ümumilikdə 9 fəvvarə tikilib.
Ərazisi 20 hektar olan parkın 14 hektarında yaşıllıq salınıb.
Abadlaşdırma zamanı XIX əsrin sonu, XX əsrin əvvəllərində Bakıya Şollar su kəmərinin çəkilişi ilə əlaqədar şəhərin müxtəlif məhəllələrində tikilən və yerli sakinlər arasında “Qüllə” kimi tanınan su qüllələri və quyuları aşkarlanaraq bərpa edilib.
Parkın ərazisində Mirzəağa Əliyev küçəsi və Təzəpir məscidi arasında 347 yerlik yeraltı avtomobil dayanacağı tikilib.
