Bakupress.az saytının təsisçisi və baş redaktoru Şəfəq Ağacanın Bakı İstintaq Təcridxanasında aclıq aksiyasına başladığı haqda məlumat yayılıb. Jurnalistin “Facebook” səhifəsini idarə edənlərin bildirdiyinə görə, baş redaktor mayın 21-dən aclıq edir. Xəbərdə ürək çatışmazlığından əziyyət çəkən Şəfəq Ağacanın səhhətinin pis olduğu da vurğulanır.
İddiaya görə, Şəfəq Ağacanın aclıq aksiyası keçirməklə istintaqın gedişinə etiraz edir.
Şəfəq Ağacan qızı Ağabalayeva mayın 1-i Bakıda tutulub. Polisin onu paytaxtın Nərimanov rayonunda, 5 saylı xəstəxananın qarşısında narkotik satarkən tutduğu açıqlanıb. Məlumata görə, Şəfəq Ağacan çəkisi 311 qramdan çox olan qurudulmuş marixuananı 100 ABŞ dolları və 1830 manata satarkən yaxalanıb.
Mayın 3-də Xətai Rayon Məhkəməsi 3 aylıq həbs qətimkan tədbiri seçib. Bakı İstintaq Təcridxanasında saxlanan jurnalist ittihamları qəbul etmir, şərləndiyini deyir.
Novator.az bildirir ki, 1976-cı il təvəllüdlü Şəfəq Ağacan Sumqayıtdakı 27 saylı orta məktəbin məzunudur. Bakı Slavyan Universitetini filoloq ixtisası ilə bitirib.
