Bəstəkar, Azərbaycan Milli Elmlər Akademiyasının həqiqi üzvü, xalq artisti, əməkdar incəsənət xadimi, Bakı Musiqi Akademiyasının professoru Arif Məlikov mayın 9-da vəfat edib.

Arif Məlikov 1933-cü il sentyabrın 13-də Bakı şəhərində anadan olub. Bakı Musiqi Texnikumunu və Azərbaycan Dövlət Konservatoriyasını bitirib.

Əmək fəaliyyətinə Şuşa Şəhər Musiqi Məktəbində müəllim kimi başlayan Arif Məlikov 1960-cı illərdən taleyini Azərbaycan Dövlət Konservatoriyası ilə bağlayaraq burada baş müəllim, dosent, professor və 1986-cı ildən bəstəkarlıq kafedrasının müdiri vəzifələrində çalışıb.

Mayın 9-da prezident İlham Əliyevin və başqa rəsmilərin adından yayılan nekroloqda deyilir ki, Arif Məlikovun Azərbaycan musiqi mədəniyyətinin inkişafı və təbliği sahəsində uzunmüddətli səmərəli fəaliyyəti layiqincə və yüksək qiymətləndirilib, o, fəxri adlara layiq görülüb, “Heydər Əliyev”, “İstiqlal” və “Şöhrət” ordenləri ilə təltif olunub.

Həmin gün Üzeyir Hacıbəyli adına Bakı Musiqi Akademiyasında Arif Məlikovla vida mərasimi keçirilib. Prezident İlham Əliyev və xanımı Mehriban Əliyeva mərasimdə iştirak ediblər.

Mərhum Fəxri xiyabanda torpağa tapşırılıb.