Prezident İlham Əliyev və birinci xanım Mehriban Əliyeva aprelin 9-u Bakıdakı Respublika Perinatal Mərkəzində Azərbaycanın 10 milyonuncu sakini Mehriban Həsənovanın valideynləri ilə görüşüblər.

Mehriban Həsənova aprelin 6-sı Bakı şəhərində dünyaya gəlib. Onun valideynləri Rauf Həsənov və Nigar Ocaqova Ağdərənin Baş Güneypəyə kəndindən məcburi köçkünlər kimi Ağdam rayonunda qeydiyyatdadırlar.

AZƏRTAC-ın məlumatına görə, dövlət başçısı və xanımı uşağın valideynləri ilə söhbət ediblər. Prezident İlham Əliyev deyib ki, Azərbaycan əhalisi artır: “Yadımdadır, 9 milyonuncu sakin 2010-cu ildə dünyaya gəldi. Doqquz il ərzində əhalimiz 1 milyon artdı. Son 15 il ərzində əhali 1,7 milyon nəfər artıb. Bu bizim gücümüzü, ölkəmizin qüdrətini artırır. Eyni zamanda onu göstərir ki, ölkəmizdə sosial-iqtisadi inkişaf gedir. Çünki əhalinin artımı birbaşa sosial vəziyyətlə bağlıdır”.

İlham Əliyev 10 milyonuncu sakin olan Həsənova Mehriban Rauf qızının adına sertifikatı valideynlərə təqdim edib. Onlara mənzil hədiyyə olunub, bu barədə çıxarış, başqa hədiyyələr verilib, eyni zamanda uşağın hesabına vəsait köçürülüb.