Qarabağ Komitəsi aprelin 20-nə mitinq təyin edib.
Bir qrup ictimai-siyasi xadimin ötən il yaratdığı Qarabağ Komitəsinin İdarə Heyətində İlham İsmayıl, Pənah Hüseyn, Mirmahmud Mirəlioğlu, Tural Abbaslı, Əvəz Zeynallı, Sahib Kərimli, Taleh Əliyev, Felmar Ələkbərov və Əlövsət Sadıqov təmsil olunurlar.
2018-ci il sentyabrın 29-da Qarabağ Komitəsi Yasamaldakı İdman-Sağlamlıq Kompleksinin stadionunda “Qarabağa azadlıq!” devizi ilə sanksiyalaşdırılmış mitinq keçirib. Amma Bakı Şəhər İcra Hakimiyyəti komitənin eyni məkanda noyabrın 24-nə, dekabrın 15-nə, 2019-cu il fevralın 16-na və martın 16-na təyin etdiyi mitinqlərə razılıq verməyib.
Novator.az-ın məlumatına görə, Qarabağ Komitəsinin aprelin 20-də paytaxtda mitinq keçirmək barədə qərar qəbul etdiyini İdarə Heyətinin üzvü Pənah Hüseyn “Facebook” şəbəkəsində açıqlayıb. O bildirib ki, bununla bağlı Bakı Şəhər İcra Hakimiyyətinə xəbərdarlıq məktubu göndəriləcək.
Aprelin 20-də Demokratik Qüvvələrin Milli Şurası da paytaxtda mitinq keçirməyi planlaşdırır.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.
