İlham Əliyev “Diqlas”dakı yanğınla bağlı müşavirə keçirdi
Martın 28-də prezident İlham Əliyev Bakının Nizami rayonundakı ticarət mərkəzində baş vermiş yanğınla əlaqədar müşavirə keçirib.
Martın 26-sı paytaxtın Nizami rayonu ərazisindəki “Diqlas” ticarət mərkəzinin binasında yanğın baş verib. Ticarət mərkəzi faktiki olaraq tam yanıb. Mərkəzdə satış obyektləri olan sahibkarlara böyük ziyan dəyib.
Yanğın hadisəsi ilə bağlı Cinayət Məcəlləsinin 225.2-ci (yanğın təhlükəsizliyi qaydalarını pozma – ehtiyatsızlıqdan ağır nəticələrə səbəb olduqda) maddəsi ilə cinayət işi başlanıb. Cinayət işinin istintaqı Fövqəladə Hallar Nazirliyinin Əməliyyat-İstintaq İdarəsində aparılır.
AZƏRTAC xəbər verir ki, İlham Əliyev 28 mart müşavirəsində yanğın zamanı insan itkisinin olmadığını, lakin orada çalışan insanlara maddi ziyan dəydiyini bildirib. Hazırda hadisənin səbəblərinin araşdırıldığını və sahibkarların problemlərinin həlli ilə bağlı tədbirlərin görüldüyünü deyən dövlət başçısı qeyd edib ki, onlar iş yerlərini, əmlaklarını itirib, onlara ciddi maddi ziyan dəyib.
İlham Əliyev Nizami Rayon İcra Hakimiyyətində sahibkarlarla görüş keçirildiyini, onlara dəstək göstəriləcəyinin deyildiyini bildirib. Dövlət başçısı vurğulayıb ki, İqtisadiyyat Nazirliyi sahibkarlarla bir-bir görüşməli və onların problemlərini dinləməli, Maliyyə Nazirliyi operativ qaydada ilkin olaraq maliyyə vəsaiti ayırmalı və həmin vəsait sahibkarlara verilməli, digər müvafiq qurumlar da yanmış malların qiymətini sahibkarlarla birlikdə aydınlaşdırmalıdır.
Fövqəladə hallar naziri Kəmaləddin Heydərov, baş prokuror Zakir Qaralov, daxili işlər naziri Ramil Usubov, iqtisadiyyat naziri Şahin Mustafayev, Nizami Rayon İcra Hakimiyyətinin başçısı Arif Qasımov məruzə ediblər.
Prezident İlham Əliyev yanğının səbəblərinin araşdırılması ilə bağlı bir daha tapşırıqlarını verib, bildirib ki, bütün ticarət mərkəzlərində ciddi təftiş aparılmalı, təhlükəsizlik tədbirləri gücləndirilməlidir.
